E futbolista di e club Manchester United, Edinson Cavani, a disculpa dialuna pa un publicacion riba rednan social, despues cu e Asociacion Ingles di Futbol (AF), a cuminsa cu un investigacion pa presunto racismo.
Diadomingo, dia 29 di november, e delantero Uruguayo a skirbi riba su cuenta di Instagram “gracias, negrito”, como respuesta na un di su siguidonan, cu a felicit’e despues di su doblete den e victoria di su ekipo contra Southampton e dia ey.
Esaki a pone e delantero den e mira di AF, cu den cuadro di su lucha contra conducta ofensivo y descriminatorio a cataloga e comentario di racista y a habri un expediente disciplinario.
Esaki potencialmente por cost’e un suspension di por lo menos tres fecha, e corant Britanico The Sun a sigura.
Manera cu a informa Cavani cu su mensahe por wordo malinterpreta, e futbolista a kit’e di su profile.
Tambe, el a aclarea cu su palabranan a pretende di ta “un saludo afectuoso na un amigo.” “Lo ultimo cu mi kier a haci ta ofende algun hende.
Mi ta opone completamente na racismo y a elimina e mensahe manera cu nan a splicami cu e por wordo interpreta di otro manera.
Mi lo kier a disculpa mi mes sinceramente pa esaki,” El Matador a sigura, cita den un comunicado emiti dia 30 di november pa Manchester United.
E Diabelnan Cora ta kere cu no tabata tin “absolutamente ningun intencion malicioso” tras di e expresion di Edinson y a manifesta cu tanto e club como su hungadonan “ta plenamente comprometi cu e lucha contra racismo.”
Aunke e termino “negrito” por wordo uza cu intencion amistoso of cariñoso den diferente region di Suramerica, su trabao na Reino Uni ta bay contra di e reglamento di AF.
Den e contexto aki, ta probabel cu e maximo organismo di futbol Ingles actua di cualkier forma bao di e premisa di castiga tur y cada un di e casonan cu uza un idioma descriminaorio.
E ente deportivo lo mester dicidi prome diaranson si e lo contacta Cavani pa scuch’e of pone den marcha un sancion, The Sun ta subraya.
E caso di e Uruguayo a trece na un incidente protagonisa pa su compatriota y exhugado di Liverpool Luis Suarez, kende na 2011 a ricibi un sancion di ocho partido pa yama repetidamente e Frances di Manchester United Patrice Evra varios biaha pa “negro” den un encuentro durante un partido.
