ORANJESTAD, Aruba – 28 di juni 2021: Dia 4 di juli venidero departamento di dialisis ta conmemora e fecha historico aki na unda ta celebra 40 aña di brinda tratamento di hemodialyse na Dr. Horacio E. Oduber Hospital. Esaki lo ser conmemora den forma di un exposicion riba departamento di hemodialisis mes.

Dia 4 di Juli 1981, bao guia di Dr. Oswald Wever hunto cu un team di 3 enfermero di ICU, a duna e prome pashent e tratamento di hemodialisis na HOH. Asina a inicia un era nobo, no solamente den e mundo di medicina aki na Aruba, pero alabes un oprtunidad pa tur esnan cu ta sufri di problema di riñon.

Hemodialisis ta e proceso na unda ta purifica e sanger den e curpa pa elimina exceso di likido y materianan toxico door cu e riñon no ta funciona debidamente.

Ricibi esaki como un invitacion personal. Bin conoce e historia y alabes conoce mas di dialisis riba diadomingo dia 4 di juli proximo entre 10:00 am y 4:00 pm.

Nos ta pidi yama y reserva bo luga ya cu nos ta tene nos mes na e reglanan di higiena y distanciamento social. Por yama di dialuna pa diabierna entre 7:30 am y 4:00 pm na 5274371 pa reserva bo luga y asina hunto cu nos corda 40 aña pasa ora a cuminsa brinda tratamento di hemodialisis na HOH.

Nos ta topa dia 4 di juli sin falta y corda pa bo biba bon, pone atencion na bo riñon.

LEAVE A REPLY

Please enter your comment!
Please enter your name here