Endy Croes: Diabierna ultimo ya a hasi un aña cu nos Baluarte Francisco Chipen Chirino a bay laga nos

0
80

Diabierna ultimo 27 di November a hasi un aña cu un Baluarte grandi den mundo di deporte a bay laga nos. Sr Francisco “Chipen” Chirino cu un trayectoria masha largo den deporte kende tabata un mentor pa masha hopi hende pero sigur pa mi persona. Chipen ta hasi masha hopi falta. Su consehonan semper pensando riba e ser humano promer. Un caracter fuerte pero intachable. Tabata 27 di november 2019 den oranan di anochi informe a drenta cu Chipen a bay hospital cu urgencia. Den un tempo rapido el a bay decansa. Chipen Chirino den mundo di Softball ( Presidente antes y Vice Presidente di ASB) te na e momentonan di su partida, tabata un motor den softball organisa. El a gana respet di masha hopi dirigentenan internacional. Chipen a ocupa diferente puesto internacional cual el a logra a propio merito. Chipen ta un di esnan cu a mira e nesecidad tempo cu Aruba a haña su Status Aparte na 1986 pa lanta un Commitee Olymico Arubano y ta e fundador y a forma parti di e promer Bestuur di COA. Chipen tambe a lanta Stichting Aubaanse Carnaval. Chipen conosi pa maneha Trappers Club. Chipen conosi den e famoso baseball club Richmond. Chipen tabata e promer manager cu a hasi Marlboro campeon. Chipen a lanta un Museum enfoka riba deportistanan local. Chipen un consehero formal di SV Royal Power. Asina nos por sigui nombra trabounan voluntario na cantidad cu Chipen a eherse. Chipen a traha den diferente comisionnan y directivanan internacional. Chipen a traha y hiba masha hopi selecion femenino y masculino competi den competencianan internacional. Mi ultimo biahe cu Chipen mi mentor tabata un biahe hopi largo na October 2017 unda nos a atende Congreso di WBSC na Botswana Africa. Unda cu Chipen a yega e admiracion y aprecio di dirigentenan internacional di taya pa su persona tabata resalta. Francisco Chipen Chirino alavez tabata un consehero den e mundo di Politica y semper ta basa su conseho cu e ser humano mester sali beneficia promer cu tur cos. Chipen a traspasa un gerencia di conosemento na tur esnan rond di dije. Chipen tabata manera un tata pa hopi di nos. Un biaha mas nos kier jama danki na Franscisco Chipen Chirino pa tur lokual Bo a hasi y a significa pa nos y pa henter e pueblo di Aruba. Bo ta hasi hopi falta. Danki Chipi! Sigui descansa den braza di Señor.

LEAVE A REPLY

Please enter your comment!
Please enter your name here