ORANJESTAD – Diahuebs y diabierna ultimo studiantenan y nan mayornan a bini hunto pa haya presentacion e programa di BECA Deportivo duna pa fundadora di Edu Search 4 u, sra. Monique Isebia. Dos anochi sumamente interesante yena cu informacion. Edu Search 4 You ta un compania di Curaçao cu tin hopi contacto y atraves di e compania hopi studiante a drenta Merca y haci un excelente papel. E deportenan cu Edu Search 4 You ta representa ta entre otro: futbol, baseball, landamento, basketball, volleyball, softball y tennis.

Minister Endy Croes a bisa cu den e vision y plan di Gabinete Wever Croes 2 y Ministerio di Deporte hopi atencion lo wordo duna na deporte. Banda di e custumber cu nos studiantenan por scoge pa bay continua cu nan estudio na Hulanda, nos kier brinda oportunidad na studiante atleta e avenida pa bay Merca atraves di un beca deportivo. E oportunidad cu Merca ta brinda e studiante atleta ta uno hopi diversifica.

Minister Endy Croes a sigui bisa; bo haya un oportunidad pa bay scol y practica e deporte cu bo ta gusta riba un otro nivel. Hopi biaha bo tin un soño pa bira un “mayor leaguer” of un strea di NBA of un landado profesional pero e caminda ta largo. E caminda no ta tur ora nos ta logra yega na nos soño. Pero e caminda aki ta bay duna bo si bo no logra concretisa bo soño, bo ta bin bek cu un bon educacion cu un diploma sea di universidad of “college”.
E studiante ta bin bek cu e preparacion fisico y deportivo di un standard hopi halto.
E mandatario a sigui bisa mi tin un yui cu a pasa aden, mi a bibe di serca y mi a mire.
Banda di esaki mi mes tabata un dirigente deportivo na Aruba, mi conoce nos mentalidad na Aruba tambe di train dos biaha pa siman ta okay of tres biaha pa siman. E manera con bo ta wordo educa na scol cu e programa di educacion con bo mester prepara bo mes fisicamente. Mi ta consciente cu nos no lo mira e resultado mayan pero mi ta sigur cu den cuatro of seis aña nos ta cuminsa mira resultadonan grandi. Curaçao ta un poco mas adelanta cu nos den esaki door cu nan tin grupo den e ocho aña a bay y a regresa bek y ta contribui banda di nan trabou den e deporte local cu idea y na manera creativo ta stimulando hopi hoben pa practica deporte. Como gobierno nos no ta ainda unda nos kier ta pa sostene e plan aki den su totalidad. E intencion ta cu bo ta wordo brinda un otro avenida pa bay studia na Merca riba un of otro progama di studiante atleta ta costa placa. Nos ta busca e studiante atleta cu tin talento, depende di e talento y depende di e programa cu e scolnan ta ofrece bo por bin na remarca pa un beca deportivo. Banda di esey gobierno na su turno mi ta spera cu na 2022 nos por concretisa esaki nos lo percura pa haya financiamento di estudio. Nos lo sigui cu negociacion cu Directie Onderwijs y Studiefinanciering pa cambionan atraves di landsbesluit pa duna e studiantenan cu tin talento cu tin un MBO tambe e oportunidad pa yega asina leu.
Ministerio di Enseñansa y Deporte kier gradici Edu Search 4 You, sra. Monique Isebia, sr. Milton Croes, IBISA pa nan cooperacion y tur esnan cu ta haci e proyecto aki posibel.

LEAVE A REPLY

Please enter your comment!
Please enter your name here