Famianan ta denuncia negligencia medico cometi contra nan ser stima; hopi cos a bay robes cu Orlando Bolivar

0
1676

Famianan di señor Orlando Bolivar ta lamenta su morto y ta condena con el a wordo trata. Pero entre tanto dolor, tabata tin hopi amor di su famia y su amistadnan. Su swa, Frank Arboleda, kende a bin di Merca, a hiba palabra durante un rueda di prensa, pa
asina e conta kico tabata nan odisea, cual e ta menciona, cu tabata un negligencia total. Ningun hende no tabata tin un respuesta concreto kico a pasa cu nan ser stima. No tin un causa di morto, no tin un certificado di defunsion, no tin un ora exacto.
Tin hopi iregularidad cu nan no ta compronde. Supuestamente e lo a haya un pre-infarto pa e forma cu el a describi diabierna anochi, prome cu el a fayece.


E no a haya absolutamente nada pa nan a yude. Solamente nan a asumi un dolor di angina
muscular entre su rebchinan. Pero no a haci’e ningun ECG, e no a haya absolutamente un oportunidad pa nan por a samin’e
y dun’e un dictamen concreto. Prome cos a pasa ora cu nan a yega e cas funeraria, nan no tabata sa nada. E personal no
tabata sa ken a haci e dictamen pa nan bay lanta morto. A bay polis y no tin un rapport. A bay hospital, ningun hende no tabata sa nada di dje, ken a atende.

E personal na warda a indica unicamente cu e ta sinti cu e no por a haci un poco mas. Esey ta tur loke famianan por a scucha, door cu e dokter a acepta su negligencia. Aunke el a acepta su negligencia, e no a haci nada mas. Simplemente a bis’e pa e bin bek dialuna.
Arboleda a agrega cu ningun hende no tabata tin e historial di e difunto. E dokter a bis’e cu aki na Aruba no ta comparti historial di ningun pashent. Aki e dokter di p’ariba, no sa nada di p’abao. Ta tristo pasobra, cuanto persona mas mester
fayece manera Orlando door di un negligencia, pa falta di ekipo aki na Aruba. Arboleda ta agrega cu prome biaha aki cu nan a bin Aruba, nan ta cobr’e $77 den caso si e mester bira malo na Aruba. E no ta compronde dicon e tin cu paga asina tanto placa, anto no tin ni un mashin di ECG drechi.

Dicon nan ta cobra seguro, Arboleda ta cuestiona.
Famianan sigur ta completamente kibra cu perdida di Orlando. Loke cu Arboleda kier ta pa esaki no pasa na ningun hende, ni Colombiano, ni Haitiano, ni sikiera Arubiano, pasobra nan no merece un trato asina ora e bira malo. Unda e dokternan na Aruba ta? Unda e sentido social, e sentido di yuda otro ta? Ningun hende no por sufri e dolor cu e famianan di Orlando Bolivar ta sufriendo.

LEAVE A REPLY

Please enter your comment!
Please enter your name here