Diabierna mainta den corte, fiscal a pidi huez pa duna 10 aña di castigo na un yiu homber cu a hinca su tata mata dia 13 di December 2021 na Rooibosal.
Tabata dia 13 di December 2021 pa 2’or di marduga, cu un Jason Matilda a hinca su propio tata, despues hinke den auto y transporte pa hospital.
Polis a informa e tempo ey: 02.00 melding a drenta via Central di Polis cu na un cas na Rooi Bosal un jiu lo a tira y hinca su tata.
E sospechoso di a mata su tata na Rooibosal ta e conocido di husticia Jason Matilda. E ta e mes persona cu dia 11 di October 2021 a horta un Waverunner y tabata core riba bao entre Sanicolas cu Palmbeach. Na 2010 el’a scucha un sentencia di huez pa 8 aña di a hinca otro persona mata.
Den pasado ya caba e tabata envolvi cu husticia y a cay cera pa asesinato.
Tabata dia 24 di April 2009, riba un diabierna anochi tempran, cu Jason Matilde na edad di 19 aña a haye den un bringamento na un bar na Playa pabao. El’a hinca su victima cu cuchui den garganta y despues a huy for di sitio hunto cu 2 otro amigo. Poco rato despues di e susedido el’a wordo deteni pa polis.
Segun su record policial, na 2007 y 2008 tambe e tabata sospechoso di a hinca hende durante carnaval.
No ta prome ves el’a hinca su tata;
Un rapport mental haci riba Jason Matilda a bisa na 2009, cu e tin trauma, pasobra e tin un mal relacion cu su tata.
Den pasado, na edad jong, Jason a hinca su tata pa defende su mama, segun rapport di physiater na 2009.
Esaki ta indica cu no ta prome ves cu el’a staca su tata y cu posiblemente e no tin un bon relacion cu su tata. Na edad di 19 aña, dia 26 Febuari 2010, Jason a scucha su sentencia for di huez: 8 aña di prison. Huez e tempo ey a bisa cu considerando e rapport di physiater, Matilde por bolbe ripiti e acto.
Despues di 12 aña, awor e ta sospechoso di a mata su tata. Ora di a detene na hospital, el’a nenga di a mata su tata. El’a bisa cu el’a yega cas y topa su tata bao sanger. Sinembargo na cas a wordo bisa cu el’a discuti cu su tata y comete loke el’a haci.
