Diahuebs ultimo, fraccion di MEP den Parlamento a bishita Rodgers Beach pa mira e avancenan cu tin andando pa cu e desaroyo pariba di brug. E proyecto di embeyecimento aki ta parti di ful un masterplan pa desaroya parti pariba di nos isla. E proyecto aki a inicia bou gobernacion di Gabinete Wever-Croes II danki na e vision di ex Minister di Turismo Dangui Oduber.
Parlamentario Evelyn Wever-Croes a indica cu ya por mira hopi desaroyo na Baby Beach, na e canchanan di tennis, y awor na Rodgers Beach. El a splica, cu tin un bunita caminda di asfalt poni, na unda hendenan por parkeer mas serca posibel di e beach. Tambe mirando cu hopi biaha ta ser bisa cu beachnan ta wordo kita for di comunidad, a enfoca pa engrandece e beach pa asina nos localnan por goza di dj’e aun mas. Parti di e proyecto ta pa kita e parti grandi cu tabata asfalta strobando e hendenan pa yega na e santo. Tambe ta indica te na unda e autonan por para pa no kita espacio di e beach, sino amplia e espacio di e beach.
“Mi kier gradici colega Dangui Oduber pa como ex minister di turismo su vision pa cu e desaroyo aki pariba di brug, tambe Aruba Tourism Authority pa aloca e fondonan pa ehecucion di e proyecto, y DOW pa nan bunita trabou. Como ex minister di infraestructura mi mester bisa cu proyectonan asina semper tabata tin prioridad. Cu esaki Aruba ta bay haña un bunita proyecto pa comunidad completo por bin pasa un dushi rato cu nan famianan y amistadnan na lama” Parlamentario Wever-Croes a expresa.
