Lider di fraccion di PPA, Eduard Pieters, a dirigi un carta formal na directiva di Camara di Comercio (KvK) pa invita tur su miembronan na un anochi di informacion crucial e diamars aki, 16 di juni. E topico principal lo ta e discusion amplio rond di e Ley di Consenso di Reino HOFA y e ley local LWHO, e cual structuralmente lo wordo trata y vota riba dje proximamente den Parlamento di Aruba.
Teniendo na cuenta e embergadura y e consecuencianan cu e Ley di Sostenibilidad di Finansa Publico (LWHO) por trece pa e bienestar di e comunidad y e structura estatal di nos pais, Parlamento ya a organisa varios encuentro cu directiva di diferente organisacion comercial y sindical. Cu e obhetivo pa e decision final den Parlamento sea uno responsabel y cu e sosten di nos pais, Fraccion di PPA kier hiba e intercambio di informacion aki na un grupo mas grandi den nos comunidad.
E anochi di informacion lo tuma luga awe, 16 di juni 2026, di 6:30 PM te cu 8:30 PM den e sede di SIMAR na Sabana Blanco 36. Durante e encuentro, tur cuater lider di e fraccionnan cu tin representacion den Parlamento lo ta presente pa comparti nan bista riba e topico den un ambiente obhetivo y transparente.
Eduard Pieters a aclara cu e intencion no ta pa habri un debate, ya cu esey lo tuma luga structuralmente den Parlamento mes. Cada lider di fraccion lo haya un maximo di 15 minuut pa presenta nan informacion inicial, y despues lo habri e cluster pa preguntanan di e miembronan presente y via plataformanan digital. Pa garantisa un fluho eficiente y productivo, e anochi lo wordo dirigi pa e moderador profesional e imparcial, Sra. Shirley Eisden. Fraccion di PPA ta spera cu nan por conta riba e presencia activo di e comercio organisa den e reunion importante aki.
