Pobresa ta un situacion cu tin diferente dimension. Sinembargo, mayoria enquesta ta toca solamente pobresa economico: cantidad di hende cu tin un entrada bou di e minimo cu bo mester pa bo por biba un bida digno y sigur. Nos  ta midi y reconose solamente e pobresa cu ta visibel pa tur. Awe mi kier papia di otro dimension di pobresa cu tambe lo mester wordo midi pa bo por combati e fenomeno inhusto di pobresa na un manera efectivo. 

Ingreso y poder di compra 

Mayoria di nos ta asumi cu un hende sin trabou ta pober. Pero tin un grupo grandi cu bou di e standardia di OECD tambe por wordo considera pober. No pasobra nan nontin entrada, pero pasobra nan poder di cumpra ta wordo afecta pa dor di gasto extra. Por ehempel, si bo no por huur un cas cerca di bo trabou of haya trabou cerca di bo cas, cual ta causa cu bo tin mas gasto di transportacion. Of si bo no ta bin na remarca pa logra un fiansa cu un interes mas abou, pero mester financia bo auto na un loanshark of un instancia financiero riba nos Isla cu ta cobra un interes di mas cu 25% effectivamente. Esey tambe ta afecta e poder di compra y ta haci mas hende pober. Specialmente ora e crisis di Covid a dal nos frontera cera y stop nos economia. Esnan mas afecta tawata esnan cu no a realisa cu nan tawata solamente 2 of 3 ‘paycheck away’ di ta pober. PUEBLO PROME lo bin cu incentiva pa instituto financiero por duna un prestamo mas abou nan esnan den necesidad. 

Salud Fysico, mental y emocional. 

Varios enquesta a prueba cu mayoria di esnan pober, tin di come. Con nan lo por cay den e categoria di pober? Bo salud fysico, mental y emocional ta wordo afecta door di e condicionnan den bo bida. Si bo tin sosten rond di bo di famia of amistad. Si bo tin seguridad di un dak riba bo cabes, si bo tin aceso na deporte y ta sinti bo mes sigur den bo propio hogar. Ademas, nos tur sa cu comestibles saludabel ta hopi mas caro. E pobresa ta sinta tambe den e calidad di e cuminda y e variacion di locual nos ta come. Mundialmente obesitas ta prevalece mas bou di personanan cu ta cay den e grupo yama: ‘pobresa scondi’. Pa colmo, den e barionan mas humilde, tin mas bar cu tin luga pa haci deporte. Covid-19 a causa mas morto bou di e grupo cu un sobrepeso halto pavia di mal nutricion. Ademas falta di vitamina D ta un factor grandi pa esnan den ICU por sobrevivi. Cera hende den cas, den mi opinion, tawata malo pa e salud fysico, mental y emocional di nos pueblo.Cu e efectonan negativo nos a habri aña 2021. PUEBLO PROME lo percura pa cada bario haya un cancha di futbol of basketbal cu un lugar pa cana of haci deporte gratis cu sufficiente luz pa sinti bo mes sigur no solamente den dia, pero anochi tambe. Pero tambe cu programanan social, educativo y deportivo riba tur tereno den tur skina di Aruba. 

Lanta, Aruba, lanta

Despues di 35 aña di Status Aparte nos ta wak e diferencia entre e grupo cu ta biba un bida ‘Aparte’ for di e resto di nos na Aruba mascla cu nunca. Cu ta come filet mignon, caminda nos ta come pan cu tuna. P’esey, PUEBLO PROME lo habri officina cu trahadornan social di nos Centro di Igualdad y Oportunidad (CIO) den Madiki, Rancho, Dakota, Paradera, The Village, De Vuijst, Brasil, Pos Chikito, Mabon etc, caminda por yega pa haya informacion y ayudo gratis pa combati e pobresa scondi cu tin na Aruba. Financia cu fondonan disponibel for di Organisacionnan di UN cu tin como meta pa combati pobresa. Pero e fondonan no ta bin disponibel si ainda nos pueblo ta sigui vota pa politiconan sin curazon y sigui sostene un Gobierno corrupto. Nan a sinta y nan no a cumpli. Awor a bira tempo pa e cambio necesario! 

Den e di dos parti lo mi sigui splica tocante pobresa scondi, riba e tereno di educacion y mas. 

Gisele-Mireille Sint Jago. 

PUEBLO PROME 

Candidata #4

LEAVE A REPLY

Please enter your comment!
Please enter your name here