Minister Geoffrey Wever:
Diaranson durante un reunion publico den Parlamento di Aruba a ser aproba e Ontwerp Landsverordening pa apodera minister di asunto economico, minister Geoffrey Wever, pa hunto cu Qredits Aruba yuda un total di 50 empresa local haya un “recovery / investment loan”, y na un interes reduci cu ta special pa empresa chikito y mediano.
Esaki ta prueba cu Gobierno ta traha hunto cu sector priva pa empodera empresanan chikito, crea cuponan di trabow y stimula entrepreneurship. Basa riba e cooperacion aki Qredits ta pone Afl. 1.200.000 pa financia mas o menos 50 compania chikito cu un interes reduci di 5.75%.
E cooperacion entre Ministerio di Asuntonan Economico y Qredits Aruba tambe a percura pa a duna 80 persona e posibilidad pa participa na e “Small Business Acadamy”. Tambe tabata tin e posibilidad pa hobennan participa na e programa di “Be Your Own Boss”. Ambos programa ta diseña pa educa empresarionan actual y di futuro.
Durante pandemia mester a busca manera pa yuda empresanan chikito y mediano den un forma rapido, mirando e situacion extraordinario, pa cual no tabata tin tempo pa warda. E tempo ey un schenking a ser duna na Qredits, pa cual e ayudo financiero aki a ser traspasa pa mas di 100+ compania pa yuda nan tene nan cabes riba awa. Minister Wever a indica di “no por haci politica cu e hecho aki, y nos ta contento cu e asistencia cu a ser brinda na un momento hopi dificil na empresarionan chikito y mediano”. E mandatario ta contento cu Parlamento a duna su aprobacion.
