– Diahuebs e homber A.(40) a presenta dilanti Hues di Corte di Husticia pa e caso penal cu Ministerio Publico a cuminsa contra dje. Fiscal ta acusa A. cu na Maart 2011, a abusa di un mucha homber R. cu e tempo ey tabatin 11 aña.
SOLO DI PUEBLO por a compronde cu A. ta desmenti di a abusa di e mucha. El a bisa cu el a sunchi e mucha y mishi na su curpa y parti intimo. Tambe por a compronde cu door cu R. tabata chantagea A. pa placa sino lo bay medio, na dado momento A. a dicidi di haci denuncia, despues cu A. a paga mas o menos 25 mil florin na R., kende actualmente ta un adulto.
MISHI Y SUNCHI MUCHA
E acusacion cu Fiscal a presenta den Corte contra A., ta di a abusa sexual di un mucha homber R. (13) na Maart 2011. Hues a bisa cu ta hopi tempo a pasa.
Hues a bisa cu e tempo ey R. tabatin (13) pero awor ya ta un adulto. Door cu A. a haci denuncia na 2022, e caso a bin na claridad. Ora a interoga R., el a bisa cu tempo e tabatin 13 aña e tabata cana riba un caminda di santo pa bay na cas di oma. A. a pasa den un auto y a ofrece un lift. R. a drenta den auto. Segun R., A. a keda puntra cuanto aña e tin. R. a bisa 13 aña y A. a bisa cu e tabata kere 17 aña. Envez di bay hiba R. na cas di su oma, el a bay cun’e na un veld banda di e Anker na Grape Field y a lock e portanan. Segun R., A ranca R. su cabez y force chupa su parti intimo y a hinca dede den su parti atras.
ACUSADO TA NENGA
Hues a confronta A. cu e declaracion aki y A. ta para riba cu e no a haci nada. Hues a sigui bisa cu R. a bisa cu el a bisa su ruman muher y ningun hende mas. Mas tempo despues R. a drenta den contacto cu A., y A. a pidi sorry. Hues a puntra A., pakico el a pidi sorry si A. ta bisa cu e no a haci nada. Segun A., el a pidi sorry pasobra e no tabata sa cu R. tabatin 13 aña. Segun A., el a kere cu R. tabatin 17 aña.
Hues tabata blo puntra A., kico a pone pensa cu R. tabatin 17 aña. Segun A., R. a cuminsa ta cu haci cosnan manera cu e kier tin un relacion.
VICTIMA A CHANTAGEA ACUSADO
Hues a mustra cu un aña despues di e caso na Maart 2011, na 2012, e ruman muher di R. a yama A. y reclam’e di a abusa di su ruman homber chikito. E tempo ey A. tabata na Hulanda studiando. Segun A., el a desmenti esey. El a bisa Hues cu e conoce e ruman muher di R., El a bisa Hues cu e ruman muher di R. a bis’e cu e no kier pa e caso aki bin na claridad y pa A. regla e asunto cu R.
Hues a puntra pakico A. a cumpra I Phone pa R. y despues a duna placanan, 12 mil Euro (25 mil florin) pa su estudio. Segun A. el a haci esey pa R. no a haci denuncia den media. R. ta menaza A. cu si no paga su estudio, e lo bay media. Tin e mensahenan aki riba whatsapp.
ACUSADO A DENUNCIA VICTIMA
Na 2022 ora cu R. a bolbe pidi placa, A. a busca asistencia di abogado. Esey a trece cun’e cu A. a bay haci denuncia y e ora ey e caso a bin na claridad caminda cu Polis a persigui R. y tambe A. Ta asina cu dia 15 December 2022, R. a wordo condena na 6 luna condicional cu 2 aña di prueba pa a chantagea A.
FISCAL TA EXIGI CASTIGO CONDICIONAL
Fiscal a bisa Hues cu e caso ta remarcabel pa cu e funcion di e victima. El a bisa cu e acusado A. ta para riba cu no tabatin penetracion. Tabatin sunchimento y pasamento di man. Fiscal ta haya cu no ta proba penetracion. Fiscal ta haya cu A. ta culpabel di haci actonan inmoral cu un mucha homber menor di edad. Na opinon di Fiscal, segun ley, apesar cu ta un menor di edad ta gaña cu su edad, e acusado ta culpable. E ta haya cu esaki ta pone hopi presion riba e acusado pa busca pa sa edad di e persona. Fiscal ta haya cu si un persona kier tin relacion cu un otro persona, mihor co ta pa pidi identificacion. Aki ta un caso di inmoralidad cu un mucha di 13 aña. Fiscal a mustra cu e victima R. a chantagea A. entre 2020 y 2022 y A. a paga mas o menos 25 mil florin pa evita cu R. lo perhudica A. su carera. Esaki ta un caso serio. Na dado momento A. a bay haci denuncia. R. a wordo condena y awor A. ta dilanti Hues pa un caso di inmoralidad. Fiscal ta haya cu ta e acusado A. mes a pone cu e caso a bin dilanti. Fiscal ta haya e caso di actonan inmoralidad haci na 2011 proba. Pa cu e castigo, el a tene cuenta cu e tempo cu a caso y tur loke a sosode. El a exigi 10 luna di prison condicional cu 2 aña di prueba.
ABOGADO
Abogado mr. Canwood a bisa Hues cu A. a admiti di a sunchi y mishi na curpa di R. E acusado a bisa cu el a kere cu R. tabatin 17 aña. El a desmenti di a penetra e mucha cu su dedenan. E abogado a bisa Hues cu no ta asina cu A. a lock e portanan. E auto su portanan ta lock automaticamente ora e auto core. E abogado a bisa cu 1aña despues e ruman muher di R. a bisa A. pa percura cu e asunto no ta sali den publicidad y pa regla cu R. Esey a pone cu A. a duna R. un I Phone. Na 2020 y 2021, den forma di chantege, R. tabata pidi placanan. E abogado a mustra tur e mensahenan cu R. a manda A. y exigi placa. Despues R. ta pidi disculpa. Apesar di bisa cu e lo stop, na 2022, R. a bolbe cuminsa chantagea A. E ora ey A. a busca asistencia di abogado y a haci denuncia. E abogado ta haya cu no por castiga A. mas cu e sunchimento. El a pidi Hues pa tene cuenta cu mas cu 13 aña a pasa despues di e incidente. E abogado a sigui bisa cu su cliente A. kier a pone un fin na esaki y e mes a bay haci denuncia. E abogado a mustra cu un condena lo por perhudica A. cu tin un acuerdo cu AZV pa un caso cu ta data di 2011.
SENTENCIA
Hues a sera tratamento di e caso y a pospone e caso pa bay pensa. Ora el a bolbe el a bisa cu e ta dicta sentencia di biaha. Hues ta haya A. culpable di haci actonan inmoral cu un mucha. E tempo ey R.(13) y A.(31). Hues a bisa cu sunchimento di un menor di edad ta actonan inmoral y mishimento na curpa tambe. Hues no ta haya proba cu A. a abusa di R. Hues a bisa A. cu mucuhanan mester wordo proteha pa hendenan adulto cu smaak sexual. Pa cu e castigo, Hues a bisa cu e ta tene cuenta cu ta promer biaha cu A. ta cay den man di husticia. Hues ta haya cu ta A. mes a pone cu R. a pidi placa. Hues ta comparti punto di bista di Fiscal. Hues ta haya cu esaki mester ta un señal na comunidad cu no por tolera tipo di cosnan asina. Hues a condena A. na 10 luna di prison condicional y 2 aña di prueba.
