E homber Colombiano biba na Aruba, P.C. (40), a presenta dilanti Hues pa e caso penal cu Ministerio Publico a cuminsa contra dje.
Fiscal ta acusa P.C. di no a declara suma grandi na Douane y tambe ta acusa P.C. di labamento di placa.
SOLO DI PUEBLO por a compronde cu Hues no ta haya proba cu P.C. a laba placa y a declar’e liber. Hues a ordena pa P.C. haya su placa bek y un multa di 20 mil florin pa no a declara suma grandi na Douane.
NO A DECLARA PLACA NA DOUANE
E acusacion cu Fiscal a presenta contra P.C. ta cu riba 9 November 2024, P.C. no a declara mas cu 18 mil dollar na Douane y ta acusa P.C. di labamento di placa.
MAS DI 18 MIL DOLLAR CONFISCA
Ta asina cu Douane a constata cu un dama lo tabatin mas placa scondi y a haci investigacion. E dama a bisa cu el a haci e homber P.C. fabor di hiba placa Colombia. Douane a haya mas cu 18 mil dollar scondi den paña y den un bleki. E dama a bisa cu 700 dollar ta di dje y e resto ta di P.C. E placa aki a keda confisca. Durante tratamento di e caso den Corte, P.C. a bisa Hues cu e no a declara e cantidad di placa na Douane door cu e momento ey e tabata ilegal na Aruba. El a bisa cu promer e tabata kier a manda e placa via lugar di manda placa pero e cantidad ta mucho mas cu ta permiti. El a bisa cu e dama ta un familiar cu a haci’e un fabor pa hiba e placa. Hues a puntr’e cuanto el a paga e dama. El a bisa cu e no a paga e dama pa haci e fabor.
Hues a bisa cu P.C. a declara na Polis cu e placa el a gana trahando riba autonan aki na Aruba. El a splica Polis cu el a bende su auto y otro cosnan na Colombia pa asina bin Aruba. El a bin Aruba cu 5 mil dollar. Segun P.C. e placa cu e kier a manda Colombia tabata pa paga riba tereno cu e tabata atrasa den paga. Hues a bisa cu Polis a haci investigacion y algun hende a bisa cu nan a paga P.C. y algun a bisa cu nunca a tende P.C. Investigacion ta mustra cu P.C. lo a gana 1100 florin y kitando gastonan lo a resta 600 florin. P.C. a bisa Hues cu e ta haci negoshi di Crypto na Merca y ta gana 2 mil dollar pa luna. El a bisa cu actual e ta inscribi na Aruba y ta trahando pa un compania. Fiscal a cuestiona e hecho cu P.C. no a paga belasting. P.C. a bisa Hues cu awor cu e ta legal e ta haciendo e areglonan pa paga belasting di loke el a traha.
FISCAL A EXIGI CASTIGO Y PA E PLACA KEDA CONFISCA
Fiscal a bisa Hues cu P.C. no a declara placa na Douane. E dama a sconde e placa den su paña y den un bleki. Fiscal a mustra cu P.C. a declara na Polis cu e placa ta di dje. E placa tabata mas cu por viaha cune sin declara na Douane. Fiscal ta haya legalmente proba labamento di placa. El a mustra cu P.C. tabata trahando ilegal y a gana masha hopi placa y no a paga belasting. Esaki ta un hecho castigabel. Fiscal a sigui bisa cu P.C. a cambia e placanan na dollars y a duna e dama pa hiba Colombia. Fiscal a exigi pa e placa keda confisca y 2 luna di prison condicional cu un tempo di prueba 2 aña pa P.C.
ABOGADO TA CUESTIONA CU NO POR CONFISCA PLACA
Abogado mr. Rosenstand a remarca cu P.C. no tabata ilegal sino no documenta. E tabata traha y cobra placa pero e no a viola Belasting. 18.400 dollar y mas placa a wordo haya riba e dama. Abogado ta haya cu e hecho cu no a declara cuanto placa ta bay cun’e, no ta un violacion of acto criminal. E abogado a bisa Hues cu P.C. ta admiti cu no a declara e placa ora di viaha. Na opinion di abogado, e hecho cu no a declara e placa, no por wordo considera un hecho criminal. P.C. a bisa cu e placa tabata pa paga tereno cu a cumpra na Colombia. E abogado no ta haya cu por confisca e placa sin mas. Na opinion di mr. Rosenstand, no por papia aki di labamento di placa pasobra e placa no ta procedente di fuentenan criminal. No por mustra cu e placa ta procedente di fuente criminal. El a mustra cu P.C. a duna splicacion bon cla di e fuente for di unda el a haya e placa y pa kico e placa tabata destina. E abogado a bisa cu P.C. a splica cu el a bende un auto na Colombia y a bin cu 4 mil dollar Aruba. El a keda cu e placa aki y a traha riba electricidad di autonan na Aruba y a splica su entrada. Tin testigonan a declara cu P.C. a traha riba nan auto y a paga. Na opinion di mr. Rosenstand, no tin indicacion cu P.C. ta liga cu fuente criminal. No tin ningun acusacion di lo ta envolvi den droga. No tin ningun indicacion cu e placa ta di fuente ilegal. Abogado ta haya cu mester declara P.C. liber di labamento di placa y e placa mester wordo debolbe.
SENTENCIA
Hues a bay evalua un rato y a dicta sentencia di biaha. Hues a bisa cu P.C. ta wordo acusa di no a declara placa cu kier a hiba exterior. Hues ta considera esaki un hecho castigabel. E acusacion di labamento di placa ta considera placa haya for di fuentenan criminal. Hues ta haya cu tabatin sospecho mirando e forma con kier a saca e placa for di Aruba. Hues a bisa cu P.C. a declara con el a yega na e placanan door di traha riba electronica di auto. Hues ta haya cu Fiscal no por prueba cu tabatin labamento di placa. Tambe Hues ta haya cu Fiscal ta bisa cu P.C. no a paga belasting pero ta Fiscal mester demostra esey. Hues a declara P.C. liber di labamento di placa. Pa no a declara placa cu kier a hiba for di Aruba, Hues a impone un boet di 20 mil florin. Hues a ordena pa P.C. haya su placa bek. Fiscal a propone cu lo por desconta e 20 mil florin for di e placa cu mester debolbe P.C. Abogado mr. Rosenstand a papia un rato cu P.C. y a bisa Hues cu P.C. ta di acuerdo y no lo apela. Fiscal a bisa Hues cu e ta bay pensa.
