Un di e condicionnan cu Hulanda kier impone riba Aruba y prop den garganta di Gobierno di Aruba ta un entidad nobo forma pa expertonan Hulandes cu lo haya e poder pa tuma decision e proximo 7 añanan den finansas di Aruba unda cu nan por interveni directamente den Gobierno y decisionnan cu ta regarda comunidad di Aruba. E “Zelfstandig bestuursorgaan” ZBO, lo ta forma pa 3 Macamba experto, kendenan por dicta kico tin cu sosode na Aruba. Nan tin e poder pa pasa tur reforma, y pa dicta e MANEHO FINANCIERO DI NOS PAIS.
Esaki ta un di e condicionnan di mas pisa cu Hulanda ta imponiendo riba cabes di Aruba y ta probecha di Corona pa asina humiya pais Aruba.
Ta comprendibel cu Mike Eman a kima tur e cusinchinan financiero di nos pais ora el’a triplifica debe di pais Aruba, pero ta Hulanda mes a permiti’e causa e desaster financiero. Awor nan kier tuma over e finansas y pone tres Macamba riba cabes di nos minister di finansas, cual de facto e minister di finansas su man lo wordo mara na antoho di poco Macamba cu lo cuminza Goberna nos pais.
Ta decisionnan pisa cu Aruba ta wordo confronta cune. Comentarionan ta drenta cu ta mihor nos muri riba pia cu biba na rudia ? Aruba mester busca otro alternativa y mester busca prestamo na otro pais cu no ta pone como condicion cu nan kier bin goberna.
E postura Hulanda unilateral mester wordo denuncia internacionalmente pa mundo henter haya sa di e intencion di Hulanda pa recolonisa nos pais. Algo cu sigur Nacion Uni lo bay bati Hulanda mata riba e locura cu el’a formula.
Ta estrictamente prohibi pa interferi y recolonisa cualkier colonia cu a haya nan libertad segun reglanan di Nacionnan Uni y accepta pa tur pais miembro.
