Banco Central di Aruba (BCA) a conclui e encuesta di percepcion di negoshi pa e promer trimester di 2026. E encuesta di percepcion di negoshi ta evalua e percepcion economico di e negoshinan local.
E asina yama ‘Business Perception Index, cu ta consisti di e indicenan di condicion economico a corto plaso y condicion economico actual, a baha cu 3,7 punto di indice te na 104,3 den e promer trimester di 2026 (mira Grafico 1).
Grafico 1: ‘Business Perception Index’.
Fuente: Banco Central di Aruba
E indice di condicion economico a corto plaso y e indice di condicion economico actual a baha cu 5,6 y 1,9 punto di indice te na 102,4 y 106,0, respectivamente, den e promer trimester di 2026 (mira Grafico 2).
Grafico 2: Resultado di Condicion Economico actual y Condicion Economico a corto plaso durante e promer trimester di 2026.
Fuente: Banco Central di Aruba
E porcentahe di negoshi encuesta cu ta anticipa un crecemento economico negativo den e siguiente 12 lunanan a subi cu 11,8 punto di porcentahe te na 14,3%. Mientrastanto, e porcentahe di negoshi encuesta cu ta anticipa un crecemento economico positivo den e siguiente 12 lunanan a baha cu 9,6 punto di porcentahe te na 42,9%, durante e promer trimester di 2026 (mira Grafico 3).
Grafico 3: Expectativa di crecemento economico den e siguiente 12 luna.
Fuente: Banco Central di Aruba
Durante e promer trimester di 2026, e porcentahe di negoshi encuesta indicando “crecemento” den empleo a subi cu 9,0 punto di porcentahe te na 51,5%. E porcentahe di negoshi encuesta cu a raporta un “ganashi” a subi cu 1,0 punto di porcentahe te na 91,0% den e promer trimester di 2026. E porcentahe di negoshi encuesta indicando “mehoracion” den e condicion economico actual di inversion a crece cu 4,4 punto di porcentahe te na 39,4% den e promer trimester di 2026. Encuanto condicion economico a largo plaso pa e siguiente 12 lunanan, 37,1% ta anticipa cu e tasa di inflacion lo ta mas cu 3%.
E relato completo di e encuesta di percepcion di negoshi ta disponibel ariba website di BCA www.cbaruba.org
