Mientras Aruba ta pasa door di un periodo di incertidumbre politico y institucional, lider di fraccion di PPA, Eduard Pieters, ta sigui insisti riba un mensahe consistente: Aruba mester mas dialogo, mas comunicacion y mas responsabilidad den liderazgo. “Nos ta biba den un tempo turbulento. Un tempo di incertidumbre pa nos pais y pa nos pueblo. Pero precisamente den e momentonan asina, nos mester sinta na mesa, wak otro den cara y tene e bon combersacionnan na beneficio di Aruba,” Pieters a declara.
FUTURO DI ARUBA MESTER TA PROME
Segun Pieters, e discusionnan actual no ta solamente tocante politica of e partidonan. Ta tocante e futuro di e siguiente generacionnan. “Ora mi ta sinta den Parlamento, mi ta pensa riba mi nietonan y e nietonan di nan. Mi obligacion ta pa salvaguardia e futuro di Aruba.”
Esey ta e mes motibo pakico PPA ta sigui promove dialogo riba e temanan manera HOFA, autonomia y gobernacion. Pieters a recorda cu e reciente encuentro cu e comerciantenan a confirma, cu pueblo kier informacion, pueblo kier participa y kier ta scucha.
“Nos a duna informacion, pero nos a haya informacion tambe. Esey ta con democracia mester funciona.”
E problema no ta e decision, sino e falta di comunicacion
Comentando riba e reciente anuncio di Prome Minister, unda e lo laga su funcion na januari proximo, Pieters a bisa cu mas cu e decision mes, e preocupacion principal ta e manera con a maneha e proceso y anuncio. “Si un lider tuma un decision personal of politico, esey ta su derecho. Pero un pais no por ta goberna via Facebook.”
Segun Pieters, e forma con a comunica e anuncio, ta lanta preguntanan serio y hopi preocupante tocante coordinacion, comunicacion y liderazgo dentro di gobierno.
E parlamentario a señala cu hasta e miembronan importante di e mesun gobierno tabata parce di no ta na altura di e decision abrupto aki, cual sigur ta duna indicacion preocupante. E vice prome minister, enbes di atende esaki den ministerraad, e tambe a opta pa atende e asunto aki riba a Facebook. Igual e “yiu politico di Mike”. Ta parce cu e gobierno aki ta goberna via Facebook. Pa colmo no tin un plan ainda tocante ken lo bira e siguiente prome minister.
“Ora bo no tin comunicacion interno, bo no por spera coordinacion den maneho di bo pais.”
Gobernanza no ta djis reaccion, pero mas un planificacion structural
Pieters a conecta e situacion aki cu otro problematica reciente den gobierno, indicando cu hopi biaha e decisionnan ta tuma sin e preparacion, capacidad institucional of coordinacion necesario pa ehecuta nan. Esaki ta e problema na Censo door di un decision di ministe Dowers tocante permisonan. E decision aki a afecta operacion di Censo y ningun ciudadano por haci un cita pa inscribi eynan. Di otro banda Ministernan no ta comunica cu otro pa soluciona e problema aki. “Goberna no ta solamente tuma e decisionnan. Goberna ta percura cu e structura, e capacidad y e comunicacion ta cla prome cu bo move.”
Dialogo ta e unico caminda
PPA ta mantene su postura, cu Aruba no tin necesidad di mas division, pero si di mas dialogo. “Nos no ta busca conflicto. Nos ta busca combersacion y dialogo. Solamente ora nos sinta hunto, scucha otro y wak otro den cara, nos por tuma e decisionnan, cu ta realmente na beneficio di Aruba y no di un partido of grupito.”
Pa Pieters, e reto mas grandi di Aruba no ta solamente economico of politico. Ta pa reconstrui confianza, comunicacion y liderazgo den un momento cu e pais tin mas necesidad di esey.
