Minister di Husticia y Asuntonan Social Sr. Rocco Tjon, a reuni cu e grupo di Aruba cu ta encarga cu e ehecucion di e plan van aanpak pa fortifica siguridad na nos frontera. Esaki ta e plan for di e landenpakket, caminda Hulanda a pone cuater miyon florin disponibel pa asina nos por fortifica siguridad na nos frontera. E mandatario a expresa di ta hopi satisfecho cu e presentacion cu el a ricibi, caminda tur e departamentonan a duna un presentacion, caminda e ehecucion cu ta tumando luga a keda ilustra. Ta trata aki di e departamentonan hudicial esta; Cuerpo Policial, Inmigracion Aruba, Guarda nos Costa, Departamento di Aduana, Kustwacht, y NCTVI. Mester bisa cu Aruba ta cumpliendo cu tur e palabracionnan cu tin cu Hulanda. 

Segun minister Tjon, tur e fondonan aki ta disponibel pa por adkiri material pa asina inverti den diferente cursonan y opleidingen pa cu personal, pero tambe pa huisvesting caminda e ekiponan multidisciplinario lo bay wordo ubica. Banda di esaki, e mandatario a indica cu e ta hopi satisfecho tambe, mirando cu den cuadro di e plan aki, Hulanda lo bay reenforsa Aruba cu personal tambe. Palabracionnan concreto a wordo haci riba nivel di ehecucion, pues “uitvoerend personeel” ta bay bin Aruba, pa asina yuda fortifica siguridad na nos frontera. Dia 4 di juli, e prome dies coleganan di Hulanda lo yega Aruba, algun lo bay reenforsa e unidad di “mensenhandel en mensensmokkel”, di otro banda algun ta bay reenforsa Kustwacht. Esnan cu ta bay ta mas visibel pa pueblo en general lo ta e tres coleganan cu ta bay reenforsa Grenspolitie di Aruba como tambe Inmigracion di Aruba. 

Principalmente, pa loke ta trata Inmigracion Aruba, loke ta hopi interesante ta cu pa prome bes Aruba ta bay conoce un “Falsidesk” tambe, esaki ta un departamento cu ta specialisa den identifica fraude di documento y di identidad cual ta algo hopi positivo y lo bay eleva siguridad na nos frontera. Manera ya ta conoci, algun tempo atras a introduci “Interpol aan de grens”, y e departamento aki tambe lo bay yuda eleva siguridad na nos frontera, pero na mes momento e ta sigui profesionalisa e departamento di Inmigracion Aruba. Dentro di poco lo tin un voortgangscommissie aki, caminda coleganan di Aruba hunto cu nan contrapartidanan na Hulanda lo evalua con e ehecucion ta andando.

LEAVE A REPLY

Please enter your comment!
Please enter your name here