Ora nos ta pega den cos bieu y nos no kier laga los, nos ta persisti den maldad, nos no kier entrega, nos ta sigui coba den bida di hende, nos ta sigui molestia, sigui tira cos na cara, no ta pordona, pero ta sigui uza pasado di hende como ofensa, p’asina halsa nos mes kierendo cu nos ta miho, anto lamentablemente e momento ey nos ta duna señal di amargura y arogancia den nos bida.
Si como mayor bo kier pa bo yiu drecha su bida, ta imposibel pa bo ta lanta zundra tur dia riba cosnan bieu. Ta yega e momento di demostra amor, pasobra amor ta cura herida, amor ta lanta hende bek ta restaura bida di hende. Pero si nos ta lanta tur dia treciendo culpabilidad delanti, esey ta haci dificil pa coreccion y disciplinaa tuma luga.
Isaias 43:18-19 ta bisa nos claramente: No recorda e cosnan di antes, ni keda pensa riba cos cu a pasa caba. Mira mi ta bay haci algo nobo. Awo esaki ta bay sali na cla. Boso no ta ripara esey? Lo mi traha un caretera den tera seco y ruinan den desierto.
Di berdad di berdad, pa nos bida avansa, nos mester pone e cosnan bieu un banda, pasobra no tin ningun clase di gananshi den keda cana cu pensamento di rencor y odio. Tur locual ta habri herida di pasado nos mester aparta di dje. Pasobra e enemigo lo keda uza esey constant pa trece tristesa y asina dramatisa nos bida constant, cu ta hiba nos bida atras y ataca nos salud mental.
Dios mes ta bisa pa laga cos bieu atras, pasobra Dios sa bon cu tin cos di nos pasado cu ta haci dolor y cu nos mes no por haci nada contra dje. P’esey Dios ta bisa nos pa aparta for di cos di pasado.
Hopi biaha nos pasado ta mara den scuridad, nos pasado ta mara den pica di inmoralidad, bruheria, orguyo, arogancia, discriminacion y den e cosnan ey no tin ningun clase di crecemento.
Diabel ta gusta biba den pasado di hende, p’asina e por wanta hende atras den scuridad y asina e por tin dominio riba mente di hende, pasobra cada biaha cu nos rabia of nos ta tristu, e diabel ta coy bentaha den nos bida y pasobra esey ta su plan, pa horta, pa mata y pa destrui (Juan 10:10).
Nos tin cu wak bon pa nos cas ta cas di oracion y no un cas di rabia y odio, pasobra cu heridanan bieu e enemigo ta haci nos cas un cas di murmuracion. Y murmuracion ta completamente contra e palabra di Dios.
Ta tempo pa nos fiha nos bista riba e bondadnan di Dios y no riba locual nos a perde den bida, pero tambe pone nos bida riba e bondad di Dios, riba tur locual El a haci pa nos y sigui bay dilanti no wak atras.
Dios sa tur cos, kico E ta permiti den nos bida, tin biaha tin prueba chikito y tin biaha tin prueba grandi y doloroso, pero den tur cos Dios ta duna nos sosten y nunca Dios ta duna nos un carga mas pisa cu nos por carga. Y tambe Dios ta duna salida for di tur tentacion.
Pakico sigui preocupa si nos no por cambia ni un cabey riba nos cabes. Preocupacion ta haci hende malo, e ta afecta hasta weso di hende. Tur locual ta presion halto por ta causa pa un simpel preocupacion.
Sinceramente, Pastoor Marcel Balootje
