Comision Mabon a presenta un proyecto nobo di mural art cu tin como meta educa, informa y conscientisa comunidad riba diferente tema social. E iniciativa ta forma parti di un esfuerso mas amplio pa sigui revitalisa e bario, crea espacio pa participacion y acerca diferente instancia na habitantenan.
Astrid Vries di Comision Mabon a splica cu e proyecto lo consisti di 12 tema social y educativo cu lo ta representa den diferente parti di e mural. Entre nan tin salud mental y fisico, adiccion, bullying y odio, famia y generacion, derecho humano, prevencion di abuso, husticia y ley, deporte y union, educacion y labor, bario y comunidad, Aruba y nos mundo.
E intencion ta cu, segun cada tema ta completa, profesionalnan y organisacionnan cu ta traha den e area concerni por bin den bario pa comparti informacion y dialoga cu comunidad. Asina e mural no lo ta solamente un obra di arte, pero tambe un instrumento pa educacion y conscientisacion.
Vries a indica cu Comision Mabon ta mira cu participacion y actividad den bario a aumenta. Despues cu Mabon a firma un Memorandum of Understanding den cuadro di e iniciativa di Bon Comun, e comision a sinti mas respaldo pa sigui desaroya proyectonan hunto cu Gobierno, organisacionnan y sector priva.
Actualmente e casita di bario ta wordo drecha y geverf y tin diferente compania priva cu ta aporta na e trabounan. Tambe ta den preparacion renovacion di e cancha deportivo y mas trabou den e area recreativo den centro di bario.
Durante e bishita a recorda tambe e trabounan cu ya a tuma luga den Mabon. Den cuadro di Cuida Aruba, e bario tabata uno di e luganan cu a haya hopi atencion. Diferente contratista a uni esfuerso pa e limpiesa y drecha e area, incluso cu trabou caya pa caya.
E proyecto di e mural art lo ta realisa bou direccion artistico di Elvis Tromp. Tromp a expresa cu p’e ta un honor pa por contribui cu su arte na un proyecto cu tin un funcion social y educativo. E ta mira arte publico como un medio cu por pone hende pensa y cu por involucra comunidad directamente.
E artista ya a participa den otro proyecto similar, entre otro e mural Welcome to San Nicolas na Bernardstraat. E proyecto ey, realisa mediante colaboracion cu Gobierno y Aruba Tourism Authority. E experiencia cu e mural na San Nicolas a genera reaccion positivo y ta un ehempel di con arte por contribui na identidad y ambiente di un bario.
Na Mabon, e intencion ta pa hobennan tambe haya un rol activo den creacion di e mural. Elvis Tromp lo traha e contornonan di e diseño principal, mientras cu hobennan di bario lo por contribui pintando y yena e obra cu color. Participacion di e siguiente generacion ta mira como un elemento importante pa logra cu e proyecto bira algo propio di comunidad.
Prome Minister Mike Eman a pone e iniciativa den e contexto di Bon Comun. El a indica cu progreso den bario no por depende solamente di Gobierno, pero ta pidi colaboracion entre Gobierno, sector priva, organisacionnan y ciudadano.
Segun Eman, bishitanan den bario ta importante pa Gobierno por mira y tende directamente kico ta pasa den comunidad. El a resalta cu ciudadano no mester sinti cu nan preocupacionnan, deseonan of necesidadnan no ta mira of scucha.
Eman a haci referencia tambe na e renovacionnan cu ya a realisa den e “flatgebouw” y den e area recreativo di Mabon. E proyecto di mural ta mira como un siguiente paso den e proceso di transforma e area y duna mas bida na e bario.
Minister di Turismo, Transporte y Labor mr. Wendrick Cicilia a pone enfasis riba continuidad y participacion di hoben. El a indica cu presencia di Gobierno den bario ta representa un forma di gobernacion caminda dirigentenan ta cerca di ciudadano y mantene contacto directo cu realidad di comunidad.
Minister Cicilia a resalta balornan manera tarea boluntario, solidaridad, empatia y atencion pa otro. Segun Cicilia, e balornan aki mester sigui transmiti na un generacion nobo, pa e trabou den comunidad no depende di un solo persona of un solo periodo.
Prome Minister Eman tambe a resalta importancia di continuidad. El a expresa satisfaccion cu hobennan ta involucra, pasobra esey ta crea oportunidad pa e siguiente generacion sigui carga e proyecto y amplia esaki den futuro.
Cu e mural, renobacion di espacio recreativo y otro proyectonan cu ta den preparacion, Mabon ta sigui den un proceso di transformacion cu ta combina infrastructura, arte, educacion y participacion di comunidad. E meta ta pa habitantenan mes participa activamente den e cambio y pa e bario sigui desaroya mediante colaboracion entre Gobierno, sector priva y comunidad.
