Ayera mi a cuminsa comparti cu pueblo e informacion importante cu WEB Aruba NV a comparti cu tur parlamentario presente Diamars Januari 11.  E tabata un mainta super educativo, sinembargo no tur parlamentario tabata presente. Ta di lamenta cu net esnan ausente ta cuestiona expertonan den e materia y nan trabao, siendo cu nan no tin ningun tipo di experticio riba e tereno, y esun cu tine, ta troce informacion pa mantene e pueblo den duda y rabia sin tin mester. Na e session di informacion aki tabata tin e oportunidad pa oposicion haya contesta riba tur nan dudanan, sinembargo nan no kier a probecha e momento, pasobra e ta desbarata nan intencionnan real; “crea chaos den nos comunidad.” Loke Aruba mester aworaki ta paz, seguridad, unidad y pa recupera di e crisis cu nos ta den pa via di e pandemia. Siguientemente mi ta bay sigui comparti e diferente informacionnan cu pueblo, pa asina tur hende  tambe por compronde con importante e mainta y “buitendag” aki tabata;

  1. Un di WEB Aruba NV su prioridadnan ta encera e vision di energia pa Aruba. Esaki mester tin continuidad, pa asina e vision cu nan tin como empresa por wordo alcansa y no stroba. E ta bira dificil pa alcansa e mihor producto na e mihor prijs pa e ciudadano, si cada 4 aña e vision aki mester cambia pasobra gobierno a cambia.
  2. Otro meta di WEB ta cu nan kier reduci emisionnan cu 45%, aumenta eficiencia cu 15%, aumenta energia renovabel na 35% pa 2030, y pa 50% pa 2050, y wak Aruba su flota di vehiculonan electrico yega te na 15% di e flota nacional. Esaki lo haci cu nos por alcansa un impacto hopi positivo pa nos medio ambiente, pasobra e emisionnan lo baha drasticamente.
  3. WEB tambe tin un vision hopi amplio cu ta cubri decadanan nos dilanti, pa baha e costo y cambia e tipo di fuel cu nos ta usando, pa fuelnan renovabel, sostenibel y mas economico. 

Lo siguiente ta un overzicht di e historia y vision unda WEB kier hiba nos Pais den cuadro di energia renovabel y sostenibilidad;

  1. Na 2004 e planta di WEB tabata usa 6180 bari di HFO pa dia pa por produci awa y coriente. 
  2. Ora a introduce RECIP fase 1 a baha e consumo pa 6227 bari pa dia y cu RECIP fase 2 +SWRO a logra yega na un consumo di 5650 bari di HFO pa dia. (2006-2008)
  3. Na 2008 WEB a introduci e windmolen park na Vader Piet cu a yuda baha e consumo di HFO na 5298 bari pa dia. 
  4. Na 2011 RECIP fase 3 +SWRO 2 a yuda baha e consumo te cu 4955 bari pa dia. Asina e SWRO Mobile, Sunrise Solar Park, FESS+BESS+IGMS/DATA a yuda baha esaki atraves di añanan te cu mas o menos 4000 bari pa dia. (2015-2021)
  5. Ta Spera RECIP 4 bay online aki mas o menos 3 luna, cual lo baha e consumo di HFO na 3271 bari pa dia.
  6. Sinembargo e “jump” grandi ta bini ora cu lo introduci gas natural como fuel, pasobra esaki lo baha e consumo di un forma sorprendente na 1358 bari pa dia! Esey ta mas o menos un diferencia di 1900 bari pa dia! Imagina kico esaki lo haci cu e prijs di nos energia, produccion di awa y coriente! Nos por conclui cu enberdad Gas Natural ta e mihor transition fuel cu lo haci un diferencia hopi grandi mes pa nos pais!

E ta importante pa pueblo conoce e vision di energia di WEB, pa asina por wak cu expertonan ta haciendo tur nan esfuerso pa pueblo tin un mihor calidad di bida, y nos medio ambiente por sigui prospera positivamente. Gas Natural ta e siguiente paso pa nos pais. Gas Natural  ta hopi mas limpi, hopi mas economico, hopi mas sostenibel y lo prepara nos pais pa por produci mas energia renovabel den futuro. Lo siguiente ta loke WEB ta desea di haci pa sigui expande renewable energy aki na Aruba;

  1. Molina di biento ta produci hopi mas energia cu solo y e ekipo ta como 60% mas economico. E Vision ta pa expande cu mas Molina di biento mas grandi y mas moderno.
  2. Tambe WEB kier concentra riba storage di energia, pasobra e energia renovabel aki ta fluctua hopi. Actualmente a inverti den un storage special pa 5 aña caba pa wak con esaki por sigui yuda contribui y stabilisa nos Grid. Esaki ta funcionando optimalmente.
  3. Si inverti y traha riba storage pa energia, esakinan por reemplasa mashinnan nobo cu ta produci energia, pasobra algun di nan ta wordo usa solamente pa peak consumption. Lo por release e energia cu ta den storage y asina no usa mas e extra machine. Esaki ta save cost y ta haci cu WEB por opera di un forma hopi mas eficiente.
  4. Energia solar ta mas costoso y su mantencion tambe. Durabilidad di energia solar ta yega te mas o menos 10-12 aña so. Energia solar por wordo produci den dia so. Pe motibo aki lo prefera bay pa molinanan di biento.

LEAVE A REPLY

Please enter your comment!
Please enter your name here