“E implementación di e projecto aki, lo tin logro nan positivo den e desaroyo di Agricultura sustenibel cu oportunidad pa hoben y adulto nan mayor”

ORANJESTAD –  Aruba su Agricultura ta encontra diferente limitación, manera entre otro, e prijs di awa y corriente na un prijs competitivo, e limitación di tereno y e temperatura extremo pa motibo di e cambio nan climático. Esaki ta hasie dificil, pa produci ariba un escala mediano of grandi y den un forma innovativo y sustenibel. Durante e pandemia di Covid, tabata tin hopi precupacion, pa locual ta disponibilidad di fruta y berdura, pa motibo di e dependencia di nos isla ariba alimento nan importa. Alavez nos ta wordo confronta tambe cu e incremento den e prijs di fleta, cual tin un impacto directo ariba e prijs di cuminda.

Sinembargo, durante e ultimo 4 ana, nos por aprecia cu tin hopi mas interés pa producción den systema hydroponico, cual ta un systema moderniza di produci cuminda, cu por brinda mas garantía ariba e éxito di e cosecha. Esaki sigur ta un posibel solución pa e problema nan menciona anteriormente y cual ta capta e atención di e hobenan, pa motibo cu nan ta sistema nan innovativo y moderniza. Na 2016, Santa Rosa conhuntamente cu TNO, a conduci un estudio ariba un variedad di producto y incluyendo producto nan local manera Boonchi, Comcomber y Yambo cu a bay bon. E resultado a mustra cu e sistema aki por ofrece e posibilidad di e diversificación den e tipo di producto.  E otro factor cual ta hasie difícil pa un entrepeneur chikito por inicia cu un projecto agrario moderniza, ta e costo di e equipo y diferente fertilizante cu mester pa e producción. E factor aki ta locual den nos concepto, ta hasie difícil pa logra stimula mas productor den inverti den e tipo di sistema nan aki. E sistema aki lo por wordo construi cu material nan cu por cumpra na Aruba mes y cual ta mas fácil tambe pa instala.

Como Departamento encarga cu e Sector Primario di Aruba, Santa Rosa ta reconoce e importancia y e oportunidad cu un sistema hydroponico por ofrece na nos futuro den e  sector agrícola. Den cuadro di esaki, a studia e desaroyo cu tin na Suriname y pa cual motibo nos a acerca e compania Hydroponics Technologies Suriname, kende nan a crea un modelo mediante un sistema mas simplifica y compacto, alavez caminda e afzet ta wordo maneha door di un cooperativa. 

E modelo di cooperativa aki ta ofrece diferente workshops na esnan interesa, duna sosten na momento di problema, disponibilidad di producto den e mercado y ta encarga cu  henter e parti di promoción y venta cu na su turno ta genera fondo pa hasi e cooperativa selfsustainable.

Regularmente, clientenan of e productor nan artesanal, ta expresa cu nan tin interesa pa ricibi mas conocemento di con pa produci den un sistema hydroponico pero ta prefera pa inicia cu un sistema chikito. Den pasado, ya Departamento di Agricultura, Cria y Pesca a wordo acerca door di e compania, Hydroponic Technologies Surinam, cu e oferta pa hasi un projecto hunto cu DLVV, pa concientiza, educa y presenta posibilidadnan con e systema aki por genera productonan fresco y alavez aporta na nos economía, den forma di micro business. Lamentablemente pa motibo di e pandemia, no por a continua cu e projecto aki. 

E gerencia di e Departamento di Agricultura, Cria y Pesca conocí como Santa Rosa, ta sumamente contento cu e sosten y cooperación ricibi for di Minister Ursell Arends, kende a ricibi un presentación for di e Director di Urban Hydro Tech Surinam, Sr. Delano Pontit y di inmediato a expresa cu e ta duna su greenlight pa continua cu e projecto. Recientemente e contrato a wordo formaliza oficialmente entre Minister Arends, encarga cu Integridad, Naturalesa, Transporte y Adulto Major y Hydro Tech Surinam, den presencia di Sra. Nathalie Maduro, Director di Santa Rosa y Sra. Karin Paris, Chief of Staff pa e Ministerio di Integridad, Naturalesa, Transporte y Adulto Major.

E projecto mes lo inicia na January 2021, pero ya e proceso di planificación y formalizacion di e contrato a keda finaliza.

LEAVE A REPLY

Please enter your comment!
Please enter your name here