Dialuna mainta e prome dia di e conferencia anual di networking di IHR den e region Caribense a tuma lugar, asina Minister di Turismo y Salud Publico Sr. Dangui Oduber a duna di conoce. Esaki ta un conferencia cu ta keda atendi pa profesionalnan/representantenan den cuido di entre otro Hulanda, Aruba, Curacao y Sint Maarten como tambe e islanan BES. E conferencia aki ta di 13 pa 17 di juni y e ta tuma lugar den e ballroom di Hyatt Place Aruba Airport.

Minister Oduber a splica cu e proposito di e conferencia di IHR ta pa comparti conocemento y experencia. Tambe pa monitoria e progreso di e implementacionnan tuma den e IHR y pa dialoga con ta sigui bay pa dilanti. Di e manera aki ta sigui fortifica Salud Publico y particularmente keda mehora e control riba enfermedadnan transmisibel den e region Caribense.

Minister Oduber ta reconoce cu tur e islanan tin nan propio identidad y cultura, pero nos ta comparti y ta confronta hopi retonan similar. Specialmente ora ta trata di e implementacionnan di e reglamento internacional di salud y e capacidadnan basico cu e islanan ta spera di por desaroya den e sentido aki. Minister Oduber ta kere cu tur e islanan por siña hopi di otro door di comparti nos conocementonan y experencianan.

Segun e mandatario e pandemia di COVID-19 a recorda nos tur con importante e ta pa ta prepara pa un pandemia. Cu e conocemento y experencia recientemente adkeri durante e pandemia, esaki ta e momento oportuno pa discuti nos fortalesanan y nos debilidadnan existente y con nos por mehora e preparacion y reaccion na momento cu tin un pandemia riba e diferente islanan.

Tin hopi topico importante riba e agenda cu lo bay discuti riba dje durante e siman aki pa yega na un conclusion satisfactorio cu lo bay fortalese e salud publico di tur e islanan. Minister Oduber ta convenci cu conferencia di IHR lo bay contribui grandemente na locual ta e “4 landen Overleg” cu lo tuma lugar otro siman caminda tur e ministernan di lo tey. 

Finalmente Minister Dangui Oduber ta gradici RIVM pa organisa e conferencia, un danki na tur e representantenan Salud Publico y expertonan di e islanan BES & CAS pa nan asistencia y participacion. Ban laga e siman aki ta uno fructifero yena cu exito, pa nos yega na e metanan nos dilanti.

LEAVE A REPLY

Please enter your comment!
Please enter your name here