Recientemente Minister Maduro a reuni cu sr. Donata y sra. Maduro di e Comision Educacion y Cultura Aruba pa haya un bista di e trabou nan cu ta wordo haci pa e Comision.
Na maart di e aña aki e Comision a cuminsa cu nan trabou nan pa traha riba un programa di educacion cultural cu lo mester wordo integra den e curiculo di scol, pero tambe pafo di scol den comunidad. Sr. Donata y sra. Maduro a brinda un splicacion di kico tur a wordo haci pa e Comision te cu awor. Minister Maduro a haya un splicacion di e planificacion pa e tempo nos dilanti na unda cu, entre otro, lo bay finalisa e ronda di reunion nan sosteni cu gruponan di interes pa informanan y tambe pa sondea e interes pa haya nan participacion activo den e trabounan cu mester tuma luga.
Educacion cultural na scol ta importante pa e mucha por forma su identidad y sinti su mes parti di un comunidad cu ta wordo fortifica cu su presencia y participacion.
Minister Maduro ta desea e Comision exito cu e trabounan necesario y ta spera cu e Comision por keda haya e sosten necesario di e sector di Enseñansa y di Cultura pa asina pronto por presenta un plan definitivo con pa integra educacion cultural den curiculo escolar y tambe den comunidad general.
