Riba 80% di personanan cu a wordo interna den hospital, segun propio rapportnan cu Jacco Vroegop a suministra na Gobierno, no tabata vacuna. Pues, e declaracion cu Jacco Vroegop a haci ta incorecto y no ta basa riba berdad, segun su propio cifranan cu e ta comparti cu ministerio di salud, Minister Dangui Oduber a bisa diaranson mainta.
Obviamente vacuna a yuda unda e personanan cu contagia cu Covid, no ta bira malo, di tal forma cu nan mester wordo interna den hospital. E cifranan aki tey y ta hospital mes a confirma esaki. Pesey mes no por compronde e declaracion di Jacco, entodo caso no ta basa riba berdad.
Minister Dangui Oduber a bisa tambe, cu el’a haya un carta firma pa profesionalnan den e Crisis Management Team di Covid-19, unda nan a condena y distancia for di declaracionnan haci dor di Jacco.
Minister Oduber a bisa Jacco, cu bo por expresa bo opinion libremente, pero haci’e cu e berdad.
Segun team di profesional a skiribi den un carta, cu e declaracion di Jacco por haci cu hendenan no ta bay vacuna y unico cos cu Jacco por logra cu su declaracion, ta menos vacuna, cu lo nifica mas morto.
