ORANJESTAD – Monumentenbureau ta e instancia gubernamental engarga cu e ordenanza di Monumento, ta encarga cu tur asuntonan general di monumento, ta prepara y desiña y traha e descripcion pa destaho pa restauracion di monumento, ta supervisa y maneha restauracionnan, ta controla y duna permiso di monumento, ta encarga cu tur asuntonan technico di monumento, duna informacion y educa y ta e instituto di conocemiento di monumento di Aruba. E departamento gubernamental aki ta ekipa cu e expertonan di monumento di Aruba.
Conforme e ordenanza di Monumento, AB 1991 no GT 46, articulo 4, Minister di Cultura, sra. mr. Xiomara Ruiz-Maduro, ta indica por medio di un decreto pa un edificio bira un monumento proteha. Monumentenbureau ta e instancia di gobierno encarga pa ehecuta e proceso di proteccion. Directora di Monumentenbureau, sra. ing Yvonne Webb-Kock tin e mandato di e Minister di Cultura pa e.o. efectua den su nomber e proteccion. Den e proceso y conforme e ordenanza ta scuha Monumentenraad cu a duna aprobacion.
Proteccion.
Noord 2 , conoci tambe come ‘Klooster” banda di Imeldahof ta un monumento proteha caba. E compleho ta consisti di un “Klooster y un Kapel“ y a wordo construi entre 1954 pa 1958. E Klooster y Kapel a wordo usa door di e zusters di Domicanessen. Misa Katholico tabata duna hopi atencion na nos muchanan y Madre superior Imelda di Dominacassenzusters di Bethanië a bin Aruba na fin di aña 1951 pa prepara un instituto pa cuida y educa e muchanan hoben. Madre superior Imelda y e zustersnan (Theresia Verwey, Lidwina van de Putten, Imelda Blom, Rosita Rens, Magdalena Knippenberg, Maria Carres y William van Leeuwen) a guia e construcion di e instituto cu a cuminsa riba 4 di januari 1954. E Klooster a keda cla na november 1958.
Riba initiativa di Fundacion Kapel Bethania, Monumentenbureau a prepara e decretonan ministerial pa agrega e interior di e Kapel y alabes clarifica e baloracion di e monumento proteha. E decreto ta wordo manda cu un carta oficial pa e doño(nan), usuario y pa e hypotheekkantoor di DLV y un notificacion lo wordo publica den e Landscourant di Aruba. Despues di seis siman di a sali den e Landscourant e lo por wordo inscribi den e Registro di Monumento. E criteria di seleccion pa indicacion pa bira un monumento protehi na Aruba den categoria A of categoria B ta stipula den un di capitulonan cu ta forma parti di e ‘Monumentenhandboek Aruba’. Conforme e “Monumentenhandboek Aruba”, Noord 2 ta clasifica como un monumento den categoria A. Den e “handboek” ta discribi e reglanan cu mester mantene pa un monumento den categoria A.
Pa e interior di Noord 2 enfasis ta riba e elementonan den e Kapel y e elementonan cu awo ta wordo proteha ta encera e altar, bankinan y kashinan cu ta pega na vloer y muraya, estatuanan den kapel, tegelnan den e compleho, plafond, etc.
Nos ta gradici Fundacion Kapel Bethania pa e cortesia di hopi portet y tambe comparti e informacion nesecario. Pa mas informacion di monumento por bishita e facebook page di Monumentenbureau y ‘like’ nos. Por pasa tambe na nos oficina situa na Schelpstraat 36-38. E vision di Monumentenbureau ta pa nos cuminsa rescata nos patrimonio pa despues restauranan pa nan keda pa nos siguiente generacionnan.
