Autoridad Colombiano a cuminsa cu un buskeda rigoroso pa dos homber cu diaranson merdia a asesina un señora M. van Zande, di 27 aña di nacional Hulandes. Nan te hasta a ofrece un rencompensa grandi pa e persona cu duna e tip di oro cu por conduci na captura di e dos personanan aki. E señora a wordo tira y a fayece, esaki a sosode na e cuidad Leticia, cu ta keda den e area mas zuid di Colombia.

E señora a wordo tira den un restaurant na Leticia, cu e ta capital di e provincia mas zuid, Amazonas, asina e comandante di polis provincial William Javier Lara Avendano a informa na prensa.

Segun Ministerio di Relacionnan Exterior, e señora ta procedente di e provincia Hulandes Gelderland. E tabata sinta cu dos otro Hulandes mas na mesa den e restaurant na momento cu dos homber arma a drenta den e restaurant y a cuminsa los tiro riba cuater brazilero, cu tabata sinta na un mesa net banda di e Hulandesnan. Un bala perdi a alcansa e dama Hulandes y a lage gravemente herida. Mesora e la wordo transporta pa hosptial caminda un rato despues e la fayece. Kiko a para di e otro dos hulandesnan cu tabata sinta na mesa cu e dama, no ta conoci.

Dos personanan, probablemente dos sicario a drenta e restaurant, pa likida un di e brazileronan sinta na e mesa banda di e Hulandesnan. E Brazilero yama Celso Caldas de Lima cu tabata nan target den e caso aki a wordo likida den e tiramento aki.
Caldas a wordo aresta caba na 2016, pa traficacion di droga durante un operacion internacional di Interpol. Esaki segun e comandante policial Lara. E dos otro Brazileronan a ser levemente herida, ambos a wordo interna na e hospital regional.

E dos sircario nan ainda ta fugitivo y ta wordo busca pa autoridad Colombiano. Polis a cuminsa cu un persecusion pa haya e dos personanan cu a tira y den e caso aki a ofrece como rencompensa 20 miyon peso cu ta equivalente na mas o menos 5276 dollar, pa e persona cu lo por duna e informacion cu por conduci na e aresto di e dos hombernan aki. Tambe polis ta investigando grabacionnan di camaranan di seguridad den area di e restaurant.
Leticia ta un cuidad di mas o menos 43 mil habitante. E cuidad ta keda den e area di Amazona den e teritorio Colombiano, banda di e Riu Amazona, frontera cu Brazil y Peru. Den e area aki e habitantenan ta papia spaño y portuges.

LEAVE A REPLY

Please enter your comment!
Please enter your name here