Corte di prome instancia a dicta sentencia contra di un dama cu a wordo gara na airport, na momento cu e kier a drenta Aruba cu 144 pilder di Viagra den maleta.
Tabata dia 25 di April 2021 cu Aduana na Airport, hasiendo nan trabao di tira control riba pasaheronan, a hala un dama un banda. A puntra e dama si e tin algo pa declara den su maleta y e dama a contesta cu no, e no tin nada.
E personal di Aduana a haci un control riguroso den su maleta y a bin haya pildernan di Viagra di 100mg. A conta un total di 144 pilder. Aduana a confisca e pildernan y a traha un proces verbal contra di e dama.
Aduana a pidi Inspectie voor geneesmiddelen pa un traha un rapport, cual Inspetor di Remedi a haci tambe, pa cual ta pone bon cla cu e dama no tin permiso y lo no haya permiso pa importa e pildernan aki.
E caso a wordo manda pa Ministerio Publico y na November 2021 e caso a wordo trata y asina a bin un sentencia di hues. Hues ta haya proba cu e dama a actua den violacion di leynan cu ta regarda remedi. Fiscal a pidi 1000 florin di boet of 20 dia cera, y hues a bay di acuerdo cu e demanda.
Un di e forma cu por importa remedi, ta cu su e remedi ta pa uso personal, pa cual mester tin un carta di dokter. E dama no a presenta un carta di dokter. Ni tampoco si el’a presenta un carta, ta considera e cantidad hopi halto.
VIAGRA 100mg:
E pilder di Viagra ta wordo bendi clandestinamente na Aruba y por costa te hasta 100 florin pa un pilder di 100mg. Pues si a intercepta 144 pilder, esaki lo por a produci ilegalmente 14.400 florin.
