ORANJESTAD – Na juli 2011 directiva di Fundacion Lotto pa Deporte a sera dealnan importante sin ningun clase di documentacion profesional.E directiva consistiendo di entre otro Silvio Janga y Elias Kock a sera un contracto di fiansa di Awg 20 miyon cu CMB y un contracto di maneho (management) cu Canadian Bank Note pa salba Lotto pa Deporte di un bancarota. Loke ta remarcabel ta cu e dealnan mes a wordo sera na juli 2011 y ta te despues achteraf dia 1 agosto 2011 ta traha un besluit pa autorisa e dealnan aki.


Mester bisa cu e proceso den ambos contracto a cana pa banda di Lotto pa Deporte na un manera masha strano.Ora a fia placa na e banco commercial e directiva di Lotto pa Deporte no por a presenta e cuenta annual (jaarrekening) 2010.Esaki a keda firma (finaliza) door di Accountant te dia 7 februari 2014! Tampoco Lotto no a traha na 2011 un businessplan pa futuro ni tawata tin un presupuesto 2011.


Ta pesey mes Canadian Bank Note (CBN) mester a para garantia pa e fiansa di Awg 20 miyon. E ‘gracia’ aki a bai acompania cu un contracto di maneho super lucrativo, den forma di comisionnan (fees), cu un duracion di 15 ana na fabor di CBN. Loke ta di lamenta cu e directiva di 2011 a firma e contracto cu CBN sin ningun clase di raport (estudio) di profesionalnan.Ta mas cu claro cu e directiva aki di Lotto a mustra falta grandi di profesionalismo, pa no papia mes di bobedad di marca mayor.Ta un prueba valido cu bo no ta capaz pa haci bo trabou manera debe ser, bo ta incompetente.E manera di traha aki sigur no ta Good Corporate Governance.


Haste e ex-Minister di Deporte Schwengle (AVP) a haya duda con Lotto pa Deporte a cana e proceso di contracto cu CBN.Ta pesey mes e la manda pidi Lotto pa Deporte aclaracion por medio di un carta fecha 20 juni 2016 titula “Het uitbesteden van het beheer van FLPD aan CBN“.Ta bon pa e actual director di Lotto pa Deporte Roland Tuitt, ex-consehero di Schwengle, publica e contesta di Lotto ariba e famoso carta aki.


Tristo ta si cu e mesun Silvio Janga, Elias Kock cs cu tawata na 2011 den directiva di Lotto ta awor aki na 2021 ketu bai den e hunta di Lotto pa Deporte causando un biaha mas un crisis finansiero den Lotto. Den communidad ta biba e pensamento serca cierto hende cu mester tene un encuesta parlamentario na Fundacion Lotto pa Deporte pa por trece tur claridad den e maneho general di e fundacion pa cu loteria y deporte y specificamente pa cu e maneho finansiero. 

LEAVE A REPLY

Please enter your comment!
Please enter your name here