Recorido na aeropuerto ta destaca innovacion, digitalisacion y experiencia di pre-clearance na Aruba

Den marco di su bishita oficial na Aruba, Prome Minister di Hulanda, Rob Jetten, a ricibi un recorido den Queen Beatrix International Airport, enfoca riba innovacion, digitalisacion y operacion di frontera.

Durante e bishita, e delegacion a haya un bista di cerca riba e sistema moderno di maneho di ekipahe (Baggage Handling System) y e operacion di U.S. Customs and Border Protection (US CBP) Pre-clearance, cu ta permiti pasaheronan completa formalidadnan di entrada na Merca caba na Aruba.

E sistema di pre-clearance, cu Aruba tin implementa pa mas cu tres decada, ta representa un modelo exitoso di cooperacion internacional y eficiencia operacional, posicionando e isla como un referente den facilitacion di biahe.

Ademas, a destaca e inversionnan reciente den infrastructura, incluyendo Gateway 2030, cu a crea un cadena digital verificabel entre persona, documento y ekipahe, fortaleciendo siguridad y eficiencia den e proseso di biahe.

Como parti di e enfoke riba innovacion, durante e recorido tambe a presenta e iniciativa tecnologico “3DXVerse”, un proyecto desaroya den colaboracion cu Union Europeo bou di un Horizon Project, hunto cu un consorcio internacional di universidad y empresa Europeo.

E sistema ta enfoca riba modernisacion di experiencia di biahe door di introduccion di “digital travel credentials”, permitiendo pasaheronan crea un “pasport digital” riba nan telefono y comparti esaki cu autoridad di inmigracion prome cu nan yega Aruba.

Mediante uzo di tecnologia di reconocimento facial, identidad di pasahero por wordo verifica na e-gates den algun seconde, reduciendo significativamente tempo di espera y creando un proceso di frontera mas rapido y eficiente.

Adicionalmente, e proyecto ta incorpora un dimension di sostenibilidad, unda biahero por ricibi indicacion di su impacto ambiental (carbon footprint) y participa den actividadnan local, manera plantacion di mangrove, pa contribui na compensacion di e impacto di su biahe.

E iniciativa aki ta ilustra con colaboracion cu Union Europeo ta contribui na transferencia di conocemento, innovacion tecnologico y desaroyo di solucionnan sostenibel na Aruba, mientras cu ta fortalece su posicion como un hub moderno y innovador den region.

E sistema di maneho di ekipahe, como parti di e modernisacion aki, ta considera di nivel mundial. E recorrido a brinda un oportunidad pa intercambia conocemento y evalua con innovacion y cooperacion internacional por sigui mehora experiencia di pasahero y fortalece conectividad entre Aruba y e resto di mundo.

E bishita aki ta confirma e rol di Aruba como un hub moderno y strategico den region, cu capacidad pa integra tecnologia avansa cu proceso di frontera pa un experiencia di biahe mas fluido, sigur y sostenibel.