Hende humilde semper lo agrada Dios, pasobra nan ta laga nan mes wordo usa door di Dios,
Nan ta disponibel, y nada no por desvia nan for di proposito cu Dios a yama nan.
Hende humilde ta pone Dios na prome lugar,y ta wak boluntad di Dios, prome cu nan haci tur cos pasobra nan tin temor di Dios.
Pa hopi tempo tin hende cu a biba cu e pensamento, cu un hende humilde mester ta un hende cu ta cana cu panja kibra, hende cu ta pober, of hende den necesidad, pero esey no ta berdad , si un hende su curason ta dirigi na Dios , pa sirbi, pa yuda, pa wak interes di otro prome cu esun di su mes, e ora ey bo ta reconoce como un hende humilde.
Un hende humilde bo por dune un posicion halto, of e por ta un rey , gobernante,un prome minister, pero nada di esey lo cambia, su curason for di e boluntad di Dios. Wak Daniel capitilo 6 completo.
Ora un hende ta humilde e ta pasa den prueba di humildad,pa asina e wordo califica door di Dios mes, cu e no ta hende di dobbel curason, pero cu e ta humilde y ta warda riba Dios pa e wordo halsa, pasobra hende no ta bay halse, pasobra un hende humilde nunca por wordo halsa door di hende envidioso
Pasobra humildad ta un spiritu, e no algo cu hende por cumpra of hende por studia pa bira humilde.
Si un hende humilde bira arogante ora e tin placa of posicion,rikesa, conocemento, etc, Dios mes lo trata cune pa bin bek den su posicion di hulmildad, no lubida riba Rey Ezekias, y no lubida e sumpinja den carni di Apostol Pablo.
Dios ta exigi humildad den nos oracion bisando : Si mi pueblo cu a wordo yama na Mi nomber, humiya nan mes,y haci oracion, y busca Mi cara,y bira for di nan mal caminda nan, e ora ey lo Mi tende for di cielo, y lo pordona nan pica y cura nan tera.
Humildad mester ta e forma di bida, di tur esnan cu ta stima Dios, pasobra Dios ta exigi humildad di nos pa asina nos por drenta den su presencia, pesey Dios ta wak nos curason, e no ta wak nos bisti, of kico nos tin, e ta wak e curason, pasobra Dios conoce cada intento di nos pensamento, y e sa cu tur locual nos ta haci ta cuminsa den nos curason.
E recompensa di humildad,y e temor di Senjor ta rikesa, honor y bida. ( Proverbionan 22:4).
Ta miho pa ta di un spiritu humilde, hunto cu e humildenan, cu parti botin cu e orguyosonan.( Proverbionan 16:19).
Asociacion cu hende orguyoso, amistad cu hende rebelde, inmoral, y cu no ta respeta Dios, ta blokia bo comunicacion cu Dios.
Un ehempel masha comun, un mucha bon mucha, ta sinta bao di palo den un grupo di bandido, diripiente AT ( Arestatieteam) a presenta, y ta tur hende ta wordo aresta, publica den prensa, y wordo sera, no ta importa si e mucha ta bon mucha, ta te ora investigacion y interogacion caba e mucha bon mucha por bay su cas.
Awel asina ey tambe ta conta pa un hende humilde cu ta asocia su mes cu hende arogante.
Sea di mesun pensamento pa cu otro,no sea orguyoso den boso pensamento, ma asocia cu e humildenan. No kere boso mes sabi.(Romanonan 12:16).
Ban pone nos curason na disposicion di Dios, y laga nos ta humilde,pa Dios usa nos pa Su Honor y Gloria.
Sinceramente, Pastor Marcel Balootje
