Gregory Bronswinkel
E retonan cu nos ta enfrentando den nos comunidad no ta simpel. Nan ta compleho y dificil. Algun ta di corto plazo y otro ta di largo plazo. Pero tur reto ta pone cu nos tin cu tuma un decision y scohe na momento cu nan ta surgi. Scohe entre esun cu ta fasil of esun necesario pa cambia y bai dilanti. Scohe entre interes personal of interes general di nos pueblo. Pa tuma un decision y scohe cu sabiduria y compasion ta rekiri un curazon puro y di curashi.
Nos ta wak e necesidad di scohe durante di e pandemia di COVID ora nos libertad personal ta clash cu e interes di cuida salud di nos famia y henter comunidad. Nos ta wak esey den e discucion y resistencia di cambio pa energia renovabel (energia di biento y solo) y nos custumber di usa energia cu ta bini di petroleo. E cambio aki ta inevitabel, pero e dolor ta den accepta cu nos mester pone
panelnan di solo varios caminda of porta mulinanan di biento na canto di nos costanan. Ta obvio cu nos no por sigui usa energia di e forma actual.
Un di e retonan grandi cu nos tin awor ta e necesidad pa gobierno baha su gastonan di personal den forma structural. Pero e reto primordial mes di un lider ta pa inspira creatividad y boluntad den pueblo pa pone prioridadnan nobo, inovativo y organisa actividadnan economico y social. Asina nos lo engrandese oportunidadnan di enseñansa, calidad di bida y salud, vivienda y trabou pa un y tur.
Sabiduria y Compasion
Apelacionnan pa actua hunto, pa sacrifica hunto, pa entrega di nos mes pa e interes general ta bayendo perdi y no ta hayando oido. E balor di sabiduria y compasion ta bay perdi ora un hende, institucionnan of gobierno no actua segun e balornan elemental di sabiduria y compassion. Esaki ta e realidad cu ta prevaleciendo rond di nos actualmente na Aruba y na varios otro paisnan na mundo henter. Nos no mester lubida cu nos tur ta hunto den e mes un barko.
Falta di sabiduria pa trece perspectiva, bienestar, calidad di bida den ful nos pueblo ta un indicacion serio di falta di compasion. Compasion ta un elemento esencial pa un comunidad sano, feliz, cu su reglanan, su orden y su responsabilidadnan. Compasion ta e base pa bienestar y harmonia. E ta e curazon di e mama of tata cu ta sacrifica di come un pida pan pa su yiunan come mientras e mes ta bai drumi bariga bashi. E ta e balor cu nos ta siña como mucha riba tereno di deporte ora nos ta hunga pa nos team gana pero despues nos ta duna man na esnan cu a perde. E balor aki nos por siña hopi mas na scol, pa competi menos y yuda esun cu ta cayendo atras. Colabora pa nos tur progresa. E curazon di compassion aki ta locual ta haci un persona, un grupo of un pais fuerte y resiliente.
E gran responsabilidad di lidernan di comunidad, lidernan social, sindical, comercial y gobernamental ta pa preveni e desintegracion, disharmonia y polarisacion entre nos comunidad a todo costo. Esaki mester manifesta den palabra y comportacion. Sabiduria y compasion ta e forsa di un comunidad y ta crea e boluntad espontaneo pa sacrifica y yuda otro den harmonia. Nos no tin cu competi cu otro henter ora. Nos no ta contrincante di otro den tur situacion. Nos ta mas fuerte como persona, grupo y pais ora nos tur ta fuerte. Pasobra tardi of trempan, morto, dolor y sufrimento ta bati na porta di nos tur.
Gregory Bronswinkel
