Diahuebs mainta mester a tuma lugar e caso di apelacion di Nelson Speed de Andrade contra su sentencia di 18 December 2024. Ta asina cu pa di dos biaha cu Hof di Corte Superior ta pospone e caso.
SOLO DI PUEBLO por a compronde cu Speed no a presenta den Corte y a wordo representa pa dos abogado nobo esta mr. Illes y mr. Carlo. Nan a tuma e caso over di abogado mr. Canwood. E abogadonan a haci un peticion por escrito pa pospone e caso y Hof a honra e peticion. Esaki ta di dos biaha cu ta pospone e caso. Na Februari 2026, mr. Canwood a pidi pa pospone e caso pasobra de Andrade tabata den exterior. Ayera mr. Illes y mr. Carlo a pidi pa pospone e caso pa nan por prepara e caso.
SENTENCIA DI 18 DECEMBER 2024
Dia 18 December 2024, Hues a dicta sentencia contra 4 sospechoso: Koolman, Speed, Giel y Lacle. Un di e sospechosonan, Koolman, ta na Hulanda y no a presenta den Corte. Hues den su sentencia, a cuminsa na bisa cu e ta declara tur cuater acusado liber di e acusacion di a forma parti di un organizacion criminal. Hues ta haya cu no tin suficiente prueba. Hues a sigui bisa cu Speed, Giel y Lacle ta culpable di a cumpra Vos. Hues ta haya proba cu Speed, Giel y Lacle a paga Vos. Cada un a haci’e na nan manera. Hues a bisa cu e ta haya e declaracion di Vos confiabel. Na opinion di Hues, no ta esey so. E declaracion di Vos, ta wordo confirma door di e chatnan riba whatsapp. Tin prestamo di placa haci y a duna regalo, pa asina move Vos como ambtenaar haci cosnan cu ta contra di su obligacion como agente di Polis.
A VIOLA OBLIGACION DI VOS
Hues ta haya tur cuater periodista culpable cu Vos a viola su obligacion di comparti informacionnan secreto di Polis. Hues a bisa cu Vos no a haci’e su so. E acusadonan a yuda door di duna diferente laptop, facilita aparato wifi, instalacion di cierto apps pa asina haya tur informacion for di radio di Polis. Hues ta haya cu cada un a haci aporte significante den esaki.
NO POR HACI DELITO PA HAYA INFORMACION
Hues a bisa cu pa cu e acusacion di organizacion criminal, no tin suficiente prueba di trahamento structural pa por papia di organizacion criminal. Pesey ta declara nan liber.
Hues a reacciona riba defensa di abogado, cu mester tene cuenta cu libertad di prensa. Hues a bisa cu en principio mester respeta esaki pa democracia den un pais. Sinembargo, e limite di libertad di prensa ta wordo determina pa ley.
Hues a enfatisa cu un periodista no por haci delito pa haya informacion. Hues ta haya cu esaki a sosode den e caso aki. El a bisa cu solamente den caso excepcional por tin excepcion.
Pa cu e castigo, Hues a bisa cu e ta tene cuenta cu seriedad di e caso. E ta haya cu aki ta trata di un caso serio caminda a pone cu Vos a viola su obligacion y daña imagen di Polis. Esaki a crea duda den Polis door cu informacion secreto di Polis ta cay den man di e acusadonan. Hues ta haya cu esaki por causa peliger den comunidad.
Hues a tuma e acusadonan na malo cu door di sensacion y nan propio interes a haci esaki.
CASTIGO
Hues a condena Speed na 18 luna di prison di cual 12 luna ta condicional cu un tempo di prueba di 3 aña. Esey ta nifica cu Speed mester bay 6 luna sera den KIA. Hues a bisa cu Speed a haya mas castigo pasobra Speed a haci e delito aki den su tempo di prueba pa e mesun delito aki cu el a yega di haci den pasado.
APELA SENTENCIA
Ta asina cu Speed a apela e sentencia y ayera ta di dos biaha cu ta haci peticion pa pospone e caso. Hof a pospone e caso di apelacion pa dia 26 October 2026, caminda lo bay trata tur e caso di nobo y tres Hues lo bay dicidi si e castigo ta na su lugar of no.
