E anuncio di Prome Minister Mike Eman cu e lo baha for di su cargo entrante 1 di januari 2027 a lanta preguntanan politico serio, specialmente mirando cu su propio partner di coalicion Futuro no tabata na altura di esaki.
Sinembargo, esaki no ta nifica cu e ta demisionario awe. Un minister demisionario ta un mandatario cu a entrega su renuncia formalmente y cu tin poder limita pa solamente trata asuntonan diario. Prome Minister Eman no a entrega su renuncia formalmente na Gobernador y su Gabinete no a cay. E ta sigui fungi cu su podernan intacto y mandato politico completo.
E pregunta cu ta keda ta: si Prome Minister Eman lo stop entrante 1 di januari 2027, kico lo pasa cu e decisionnan grandi y urgente cu nos pais mester tuma desde awor?
HOFA: un decision cu no por keda sin debate
Un di e decisionnan mas crucial riba mesa ta HOFA, e Rijkswet cu ta stipula normanan pa finansas publico y supervision financiero di Aruba. Bou di e propuesta actual, CAft lo duna cuenta directamente na Rijksministerraad en bes di rindi cuenta na Parlamento di Aruba. For di un organo di conseho, CAft ta pasa pa haya un rol decisivo den tuma decision pa Pais Aruba.
E pregunta no ta si disciplina financiero ta necesario. Aruba a demostra caba cu e por. E debe a baha di 117% pa 61% di GDP bou di nos propio ley (LAft), e nivel mas abou desde 2011, confirma pa Raad van State mes. E pregunta ta: pakico un Aruba financieramente fuerte mester un ley permanente di Reino pa maneha su propio presupuesto?
Esaki ta un decision cu lo tin consecuencia pa hopi aƱa. Pa e motibo aki, un debate den Parlamento ta urgente y necesario.
Eman por bay, pero no sin duna cuenta na pueblo
Un premier por stop. Un partido por cambia di lider. Pero Mike Eman no ta solamente premier di AVP cu Futuro. E ta Prome Minister di henter Aruba. Y mientras e ta ocupa e cargo aki, e tin responsabilidad completo cu e pueblo, no solamente cu su partido.
Si e ta sigui como premier te cu 2028, e mester goberna cu responsabilidad completo. Si su coalicion no tin confiansa, e caminda mas corecto ta pa aclara si e Gabinete mester sigui, si mester cambia liderazgo, of si mester entrega renuncia. Laga Aruba den incertidumbre mientras decisionnan grandi y crucial manera HOFA ta riba mesa no ta un opcion.
E punto clave pa pueblo no ta e persona cu ta bay. Ta kico ta wordo firma, entrega y dicidi den nomber di Aruba prome cu e bay!
