Parlamento di Aruba a papia unanimemente y awor ta turno di Gobierno pa actua. Esaki ta e posicion di parlamentario di PPA, Eduard Pieters, despues cu tur fraccion den Parlamento a yega na acuerdo pa manda un señal cla na Gobierno tocante situacion na Noordkust y e preocupacionnan expresa den e manifestacion reciente.
Pa Pieters, e asunto no ta solamente ATV of UTV. Ta trata di algo mas fundamental: Gobierno mester mantene su mes na ley y ehecuta e responsabilidad cu e ley ta indica. “Nos, via Presidente di Parlamento, a manda un instruccion cla pa Gobierno di Aruba: mester mantene su mes na ley.”
E ley tin nomber: ROPV, AB 2021 no. 123
Pieters ta referi specificamente na Ruimtelijk Ontwikkelingsplan met Voorschriften (ROPV), estableci mediante Landsbesluit, houdende algemene maatregelen, di 28 di juli 2021, AB 2021 no. 123. E ROPV a drenta na vigor dia 1 di september 2021.
Segun interpretacion cu Pieters a presenta durante conferencia, e cuadro aki no ta bisa cu ATV, UTV of tur vehiculo motorisa automaticamente ta prohibi di transita den tur area natural.
“Ningun caminda ta poni cu un ATV of UTV no por bay e camindanan aki.” Pieters su punto ta, cu Gobierno mester organisa y regula e uzo, teniendo proteccion di naturaleza como condicion central.
Regulacion y proteccion si. Prohibicion general, no!
Pieters no ta argumenta pa un Noordkust sin regla. Al contrario. E ta menciona e condicionnan concreto cu Gobierno por establece: ruta determina, velocidad, nivel di ruido, cantidad di vehiculo y area sensibel, cu mester haya proteccion special. Su argumento ta: pone e regla y percura pa cumpli cu ne. Esaki ta importante, pasobra ROPV no ta simplemente un documento politico. Ta un instrumento huridico, cu ta establece ‘voorschriften’ pa uzo di teritorio di Aruba.
“Bo mester bin cu e reglanan,” Pieters a enfatisa.
Desde 2021 Gobierno tabatin tarea pa regla esaki
Aki ta caminda Pieters su critica bira politico. ROPV ta vigente desde 2021. Segun Pieters, gobierno anterior a pone e ley na vigor, pero no a termina di establece tur condicion necesario pa su ehecucion. Gobierno actual tampoco a resolve e problema y ya nan ta dos aña den gobernacion. Awor, mientras pueblo ta enfrenta e barancanan, incertidumbre y limitacion di acceso, ambos banda ta culpa otro. “Aruba ta cansa di politica, unda MEP y AVP ta bringa otro y punta dede, ken a haci of keda sin haci kico.”
Pa Pieters, e pregunta ya no ta ken tabata na poder, ora ROPV a drenta na vigor. Su pregunta ta: ken ta dispuesto pa percura pa e condicionnan awor?
Noordkust ta mas cu UTV
Pieters a recorda cu e manifestacion no tabata solamente relaciona cu tour guides. Tabatin piscadonan, famianan y ciudadanonan cu ta uza Noordkust recreativamente.
E ta menciona hasta su propio historia familiar: su welo tabata piscado.
P’esey, un decision tocante acceso tin consecuencia cu ta bay mas leu cu turismo. Ta toca tradicion, recreacion, pesca, deporte, seguridad y hasta acceso pa polis y servicio di emergencia.
Parlamento a papia. Kico Gobierno ta haci awor?
Pieters no kier pa Aruba keda simplemente keda warda riba un proceso hudicial, mientras incertidumbre ta continua. Su yamada ta pa Gobierno sinta cu e stakeholders, determina ruta, pone condicion, proteha naturaleza, permiti vehiculonan si motor transita y crea control efectivo.
Parlamento a tende pueblo. Parlamento a logra consenso. Y desde 2021 Gobierno tin un ROPV cu mester a ehecuta. Awor, segun Pieters, excusa mester termina. “MEP y AVP, pueblo ta cansa di tiramento di culpa y AVP-FUTURO asumi e rol di maneha y goberna e pais aki. Proteha naturaleza, respeta derecho di pueblo y ehecuta e ley cu Aruba ya tin,” Eduard Pieters a finalisa bisando.
