Durante su mision oficial na Den Haag, parlamentario Eduard Pieters di fraccion di PPA, a pone un enfoke distinto riba e rol di Aruba dentro di Reino Hulandes. Pieters a enfatisa cu Aruba no mester solamente ta un pais cu ta defende su posicion, pero nos mester busca e caminda pa bira un socio proactivo, cu ta busca na fortalece e relacionnan cu ta determina e futuro di henter Reino. Su mensahe tabata consistente durante tur e reunionnan: un Reino fuerte no ta construi cu presion of distancia, pero cu dialogo, comprension y confianza mutuo.
Relacion no ta automatico y mester construi activamente
Segun Pieters, un di e debilidadnan mas grandi dentro di Reino ta e falta di relacion directo entre e hendenan cu ta tuma decision. Hopi politico na Hulanda, no conoce realidad di Aruba profundamente, no ta conecta cu e contexto local y p’esey tin un distancia cu ta afecta e decisionnan. “Nos no por asumi cu nan ta compronde nos, nos mester crea e comprension,” Pieters a indica. Esey ta e motibo pakico su presencia na Den Haag no tabata simbolico, pero strategico, unda su rol tabata pa construi e brug, crea confianza y partnership y duna contenido real na e historia di Aruba.
Dialogo como instrumento politico, no debilidad
Den su encuentronan cu diferente partido, incluyendo esunan cu no semper ta alinia cu posicion di Aruba, Pieters a enfatisa importancia di dialogo sin barera.
“Relacion fuerte no ta construi cu e hendenan cu bo ta di acuerdo cu ne so. Ta construi cu tur hende cu tin influencia riba decision,” el a bisa.
E enfoke aki ta move for di un politica defensivo pa un politica proactivo, unda Aruba no ta warda pa haya invitacion so, pero ta bay directamente pa participa y dialoga cu contenido riba posicion di Aruba.
Un Reino mester ta basa riba igualdad y respet reciproco
Un punto central den su mensahe tabata, cu e relacion dentro di Reino mester evoluciona.
E relacion no mester ta uno cu ta basa solamente riba comparti un cuadro constitucional of cu tin un historia comun. E relacion real mester ta basa riba confianza y respet di ambos banda, transparencia y comprension di diferencia entre e paisnan. “Cada pais tin su propio realidad. Si nos no compronde esaki, nos no por construi un Reino fuerte,” Pieters a subraya.
Cooperacion como solucion pa desafio comun
Den lugar di mira e desafionan como problema di un pais so, Pieters a pone un otro vision riba mesa. Reino Hulandes mester colabora riba tema economico, comparti conocemento y crea e oportunidadnan comun. Specialmente den contexto di cambio global, economia y presion internacional, e colaboracion aki ta bira mas importante ainda.
“Nos no ta fuerte separa, nos ta fuerte ora nos traha hunto,” Pieters a indica.
Un inversion den futuro di Reino
Segun Pieters, e bishita na Den Haag no tabata solamente pa e parti presente, pero tambe pa e futuro. Un futuro unda mester por crea relacion politico, fortalece contacto institucional y aumenta comprension mutuo. Di e forma aki Aruba ta inverti den un posicion hopi mas fuerte dentro di Reino. “Relacion ta algo cu bo ta construi cu tempo. Si nos no cuminsa awe, nos no lo haya resultado mañan,” el a bisa.
Pa Pieters, e mensahe final ta profundo pero simpel. Reino Hulandes no por funciona sin confianza, confianza no por existi sin relacion y relacion no ta construi sin esfuerzo consciente y consistente. “Nos mester move for di un Reino di distancia, pa un Reino di conexion,” Pieters a conclui. “Paso solamente asina nos por garantisa cu tur pais, grandi of chikito, ta sinti cu nan tin un lugar real den e futuro di Reino.
