Diahuebs ultimo Parlamento a reuni den un setting di “vaste commissie vergadering” cu un delegacion di Hospital kendenan a bin cu un delegacion di algo mas cu 10 persona entre Raad van Commissaris, expertonan, Directuer, Sindicato di Hospital pa asina brinda Parlamento un presentacion detaya di e situacion real di Hospital y cu cifrasnan actualisa pidiendo ayudo na Parlamento .
Kico ta pasando na Hospital?
Hospital ta den un nesecidad financiero urgente pa por garantisa cuido. A remarca cu por ehempel gastonan di solamente material a aumenta cu mas di 16% debi na hopi factor. Entre otro aumentonan drastico di transporte cu barco y avion, aumento di prijs di gasolin y diesel ta causa cu prijs di materialnan a aumenta.
Tambe a remarca cu antes Hospital ta opera y maneha su edificio y un area di 19.000 M2 pero desde a tuma e parti nobo over esaki a aumenta pa 35.000 M2. Pues mester paga hopi mas na coriente, awa, limpiesa, mantencion chikito mientras semper a keda ricibi e mesun cantidad di placa na balor pa maneha 19.000 M2. Un otro problema ta cu un total di 58% di turistanan ta bin Aruba sin seguro of “onderverzekerd” y nan mester wordo atendi ora di emergencia hasta hasi uso di Intensive care Unit. Personanan inducomenta tambe tin mesun derecho pa wordo atendi y ta ricibi tur atencion y servicio. Hende yega Hospital pia kibra, otro cu hersenbloeding etc ta deber di Hospital pa duna e servicio. Hospital tin cuanta habri pa cu esaki di varios anja na balor di 30 miyon florin y lo ta bayendo corte december proximo contra Gobierno pa cu e parti aki. Mester un areglo structural pa e cuestion aki. AZV desde 2013 tin un areglo y ta financia Hospital atrabes di un lumpsumdeal unda cada aña ta duna Hospital un aumenta di 2% di e presupuesto di a anja coriente pa cu e proximo anja.
Kico ta consecuencia di gobierno cu no ta tuma desicion?
Como cu gobierno y AZV no a come across cu Hospital no a keda nada otro pa Hospital mes tuma algun desicion pa por keda brinda servicio.
A laga sera (1) kamber di operacion y awor ta draai solamente riba uno. Tambe a stop testnan di endoscopia riba diasabra. E accion nan aki ta pa por baha gasto y mantene Hospital ta draai brindando servicio aunke limita. Consecuentemente awe nos tin 778 patient enespera pa wordo opera y un otro lista di 140 patient enespera pa pasa un test di endoscopia. Danki AVP-Futuro pa no tuma desicion.
Minister Merin Wyatt Ras ta sconde tras di investigacion:
Mientras minister no kier tuma un desicion manera e minister anterior Dangui Oduber si a yega di hasi. Den e ley di AZV tin un kernbepaling artikel 2 a Lid 1 cual ta permiti e minister “pa ley” duna AZV un instruccion di caracter general ( den e caso aki pa Hospital) cu tarea pa asigna fondo cual AZV mester ehecuta. Minister Mervin Wyatt Ras no ta reuni mas cu Hospital y kier warda riba un investigacion di BDO Hulanda riba e parti di e maneho financiero. Apenas otro siman e Hulandesnan ta yega Aruba pa inicia cu e investigacion aki banda cu Deloitte a hasi uno caba. Rapport final posiblemente den luna di Januari 2027. A caso abo cu dolor por bay cas y biba asina te otro anja? Bida di hende no tin un “pricetag”. No ta husto pa bisa e 778 patientnan bay cas biba cu bo dolor y warda investigacion mientras Mervin ta come ayaca, calacuna y ham bay off den december. Investigacion ta ok y ta bon bini kisas hasta nesesario. Pero mester tuma accion awor pa brinda ayudo na esnan den dolor y ora investigacion keda kla Januari 2027 Bo por corigi of modernisa maneho di acuerdo cu e resultado. E patientnan tin mester di un ayudo ayera y no mayan. Mescos tin 1300 empleado na Hospital trahando bou stress pisa door di e situacion aki. Un gobierno incapaz pa goberna y mas aun no kier tuma desicion. Goberna ta tuma desicion y den e caso aki un desicion na fabor di nos patientnan den dolor y 1300 empleadonan den stress. Siman entrante lo exigi Mike Eman pa tuma rienda di Hospital y tuma desicion. Despues di investigacion por trek recht tur lokual e investigacion lo por trese dilanti pero awor dolor di nos hendenan tin prioridad.





