Sr. Mike Eman a usa su derecho di stem motivering pa papia di pobresa na Aruba. Segun sr. Mike Eman no mester bin cu niun tipo di medida pero mester bin cu inversion. Mi no por a kere con sr. Mike Eman por a declara un barbaridad gigantesco asina aki, sabiendo cu entre 2009-2017 el a hinca Aruba den e pio debe di historia. Esaki ta sin menciona con sr. Eman a suta nos pueblo cu 30 medida traicionero cu a hinca hopi famia den pobresa! Ora cu sr. Eman a hipoteca nos pais pa casi 80%, Hulanda mester a interveni y a pone un KB riba su cabes pa via di su maneho desastroso y a pone CAft riba lomba di Aruba for di e tempo ey enadelante. Sr. Eman su liderazgo fracasa a pasa pa historia como un di e momentonan mas bergonsoso pa Aruba. Kico sr. Eman a bay haci? Bay sinta yora bao palo y bebe ensure, mientras e pueblo a transiciona den pobresa y necesidad.
Mi kier a puntra Sr.Eman; bo a sinti e dolor di e famianan ora bo a impone e medidanan aki riba nan? Bo a pensa riba esnan cu menos entrada ora cu a subi: 15% riba coriente, 25% riba vastrecht di coriente, a subi grondbelasting riba balor di propiedad cu 15%, aumento di 2% di AZV, cobramento di taxista na airport, aumento di edad di pensioen pa 65 aña y hopi otro medida mas! Hende no por come klinker y asfalt sr. Eman. E realidad crudo ta cu pais Aruba mester di entradanan pa por cumpli cu su gastonan. Sr. Eman ora bo a hipoteca nos economia na casi 80%, bo a choca cualkier otro gobierno pa por inverti den nos pais! Cu landspakket den lugar y pronto Raft tambe, no lo keda mucho espacio pa gobierno maniobra den e parti economico. Sr.Eman conoce e realidad crudo aki pero ta prefera hunga cu emocion di pueblo y mantene un narativa destructivo despues cu e la hipoteca nos pais y limita nos pais economicamente.
Mi tin gana di sa, sr. Eman, ta na unda bo ta pretende cu Aruba lo haya placa presta pa inverti aworaki siendo cu bo sa masha bon cu nos debe nacional ta 115% di nos GDP. Ta parce cu sr. Eman no a siña su les na 2014-2015. Un maneho desastroso cu e mesun vision deficiente, cual a hinca Aruba den un megadebe cu a afecta famianan di entrada minimo grandemente. Pobresa a bati na porta pasobra sr. Eman a crea un crisis financiero pa Aruba. Ora cu sr. Eman a endeuda nos hendenan el a preocupa pa pobresa? Ora cu el a bin cu 30 medida el a worry pa e pobresa bao di su maneho? Ora cu sr.Eman a hisa tanto gasto pa famianan el a bay cas pa cas pa wak si nan tin di come?
Den otro palabra, sr. Eman su vision pa Aruba nunca a cambia. E ta propone un liderazgo cu historia mes a demostra cu ta desastroso pa Aruba. Tur esaki ta muestra cu Mike Eman no tin vision, no sa kico pa haci y no tin curason pa pueblo. Un cos si, e tin hopi curashi pa papia tur e barbaridadnan desastroso aki! Liderazgo (si por yame asina) manera di AVP, nunca mas!
