Parlamentario Shailiny Tromp-Lee: cifranan di CBA ta indica cu turismo ta keda e motor di nos desaroyo economico positivo y acelera

Dia 6 di november 2023, Banco Central di Aruba (BCA) a publica e “State of the Economy” pa e di dos kwartaal di 2023. E publicacion ta contene un sinopsis y analisis di e desaroyonan economico riba nivel nacional y internacional.

Den nan publicacion nos por tuma nota cu den e di dos kwartaal di 2023, turismo un biaha mas ta e motor principal tras di crecemento economico. Durante di e cifranan comparti nos por conclui cu den e prome seis lunanan di 2023, mayoria di e indicadornan turistico a realisa un mehoracion compara cu e mesun periodo di 2022.

No solamente e cantidad di bishitantenan a subi. Nos por mira tambe cu e grado di ocupacion den hotelnan tambe a subi compara cu e mesun periodo den 2022. Loke sigur mas ta resalta ta e hecho cu tarifa pa camber a subi significantemente. Ingreso turistico pa anochi tabata na aña 2019 Afl. 337,1 pa anochi, na aña 2022 Afl. 424,1 pa anochi y pa aña 2023 (te cu awor) Afl. 456,2 pa anochi. No obstante cu e hecho cu hotelnan a subi nan prijsnan drasticamente nos por mira cu e duracion promedio di anochi cu un turista ta keda den hotel a keda practicamente mescos esta di 7,2 a bira 7,1%.compara cu aña pasa. Tur e cifranan aki a conduci cu e entrada turistico a aumenta cu 22,5 % den e prome mita di aña 2023.

E cifranan aki ta hopi alentador y beneficioso pa cu recuperacion di nos pais. Sigur nos por bisa cu ta keda demostra cu e maneho dirigi na atrae e turista cu ta gasta, ta dunando su fruto. No solamente nos por mira un rendimento solido di e sector turistico y crecemento economico pero tambe cu e cuponan di trabou necesario ta keda crea. For di e cifranan nos por mira e cantidad di relacion di empleo registra na SVB a subi, indicando un mehoracion den mercado laboral, consistente. Combina cu e maneho relaciona cu bnos mercado laboral nos por bisa cu poco poco nos ta sigui baha e grado di desempleo na nos pais. Algo sumamente importante y necesario.

No ta mucho tempo pasa Gobierno a publica e resultado di e Labour Force Survey cu a indica cu desempleo a baha di 6.4% pa 4.3%. Cu otro palabra nos ta riba un bon caminda. Nos pais conoce su retonan, nos famianan conoce nan retonan, pero mi ta convenci cu trahando hunto poco poco nos lo por surpasa tur e retonan cu e pandemia a trece cu ne.