Durante e reunion Tripartiet di Parlamento di Aruba, Corsou y Sint Maarten, cu a tuma luga dia 15 di october na corsou, Parlamentario Shailiny Tromp-Lee a pidi atencion pa e echo cu e tres paisnan caribeño ainda no a ricibi un contesta formal riba e resolucion conhunto di nan delegacionnan parlamentario tocante e posicion di Reino Hulandes riba un resolucion di Nacionnan Uni relaciona cu sclavitud.
Preocupacion pa falta di consulta
E resolucion conhunto aki, aproba durante e reunion Tripartiet na Den Haag na juni 2026, ta expresa e preocupacion di e tres delegacionnan pa e decision di Reino Hulandes di abstene di vota riba e resolucion di Nacionnan Uni di 25 di maart 2026, cu ta reconoce sclavitud y e trafico transatlantico di hende como un di e crimennan mas grave contra humanidad.
Segun e resolucion conhunto di e paisnan caribeño; Aruba, Corsou y Sint Maarten no a wordo consulta previamente, a pesar di e gran importancia historico, social y moral cu e tema aki tin pa e tres nacionnan.
Despues di su aprobacion na juni, a entrega e resolucion na e presidium di IPKO cu e peticion pa e coleganan di Eerste y Tweede Kamer pasa e documento pa Gobierno di Reino. A solicita un contesta por escrito y motiva di Gobierno di Reino, hunto cu un proposicion concreto pa mehora e procedementonan di consulta dentro di un termino di tres luna.
Recordatorio formal pa Gobierno di Reino
Durante e reunion di october, Parlamentario Tromp-Lee a señala cu e plaso di tres luna a pasa caba sin cu e respuesta solicita a yega. Pa e motibo aki, el a propone pa manda un recordatorio formal y duna Gobierno di Reino un periodo adicional di un luna pa contesta. E proposicion di Tromp-Lee a wordo aproba, y e recordatorio lo wordo manda pa Hulanda.
Rol structural den decisionnan internacional
Pa Tromp-Lee, e asunto aki ta bay mas leu cu simplemente ricibi un contesta:“Nos mester garantisa cu un situacion asina no ta ripiti. Aruba, Corsou y Sint Maarten mester wordo consulta na tempo y tin un rol real den e preparacion di decisionnan internacional cu ta afecta nos historia, nos identidad y nos sociedad.”
E resolucion ta pidi pa e tres paisnan tin un rol structural den e preparacion di posicionnan di Reino riba temanan di derecho humano, responsabilidad historico y otro decisionnan internacional cu por tin impacto riba nan.
Tromp-Lee ta spera cu awor si Rijksministerraad lo duna e contesta solicita y cu e situacion aki lo conduci na procedementonan di consulta mas cla y efectivo, pa asina Aruba, Corsou y Sint Maarten no keda exclui di decisionnan cu ta afecta nan.
