Esaki ta Lucas 1:37 e versiculo cu e angel Gabriel a convence Maria cune, cu tur locual cu Dios a manda bise ta posibel.
E angel Gabriel a splica Maria bon cla cu aunke e no tabatin relacion cu hende homber, con e lo sali na estado.
Na prome lugar e a bise: Spirito Santo lo bin riba bo, y e poder di e Haltisimo lo sombra bo, y pa e motibo ey Esun Santo cu tin cu nace lo wordo yama Yui di Dios.(Lucas 1:35).
Tambe e angel a bisa Maria con Dios a pone su pariente ( Famia) Elisabeth cu tabata wordo yama steriel concebi den su biehes y awor e ta den su di seis luna.
E palabra nan aki mester convence nos awendia cu locual Dios a haci ayera e por haci awe tambe, pasobra pa Dios nada ta imposibel.
Lamentablemente nos tin hopi hende ta papia , pero poco hende ta kere, cu Dios ta Todopoderoso.
Hopi ta haci bofon, cu un bida yena cu duda, cu un boca grandi bisando Dios a tarda, pero nos tur sa cu esun cu ta duda no por ricibi nada di Dios, pasobra e ta un hende di curason dobbel.( Santiago 1:5-8).
Ta tempo di para fuerte y firme pasobra nos tur ta yama pa cana den confiansa cu Dios, wak bon cuanto hende e diabel pa pone desvia for di nan Fe y nan a bay tras di fabula di bruheria, ciencia, pensando cu hende tin mas poder cu Dios, pero hopi no ta nota e gran decepcion cu ta na caminda.
Bendiciona ta e hende cu ta confia den Señor,y kende su confiansa ta den Señor. ( Jeremias 17:7).
Nos tin hopi motibo y rason pa confia den e palabra y poder di Dios;
Dios no ta hende cu E lo gaña,
Ni yiu di hende cu E lo repenti.
Acaso E a bisa, y e lo no hacie?
Of E a papia. Y E lo no cumpli? ( Numbernan 23:19).
Kere den hende, Agrada hende,Compromete cu hende, ricibi fabor di hende, tur ta parti di e amistad cu mundo ta ofrece pasobra esey ta parti di e sistema di mundo.
Den tur esaki nos ta mira falta di e temor di Dios ta avansa, y eyden tur scuridad ta reina, pasobra ta dificil pa pone boluntad di Dios un banda y haci hende contento.
Bo tabata sa cu awendia den tur locual ta di Dios, malbadonan kier sluip drenta, cu tur tipo di disfras, pa asina nan por tin control riba hende y pensamento di hende? Ta bon pa nos tene cuenta locual ta para scirbi den Judas 1:4.
Hesus Cristo ta mescos ayera y awe y pa semper. ( Hebreonan 13;8).
Den Su palabra E a declara na nos cu nunca E lo bandonan nos, y cu nunca E lo laga nos desampara.
Tur bon regalo y tur don perfecto ta bini for di ariba,y ta baha bin for di e Tata di lusnan , serca kende no tin variacion ni sombra di cambio.( Santiago 1:17).
Sin fe ta imposibel agrada Dios,pasobra Esun cu ta bini serca Dios, mester kere cu E ta Esun cu ta recompensa, esnan cu ta busca E. ( Hebreonan 11:6).
Lo bo warda den pas perfecto, esun cu su pensamiento ta permanece den Bo, pasobra e ta confia den bo.Confia den Señor, pa semper, pasobra den Dios e Señor nos tin un baranca eterno.( Isaias 26:3-4).
Ta tempo pa nos pone tur nos confiansa y speransa den Dios, pasobra pa Dios nada lo ta imposibel.
Sinceramente, Pastor Marcel Balootje
