Durante ceremonia relaciona cu restauracion di Iglesia Adventista di Shete Dia na Bernhardstraat, Pastoor Calix Ashby a comparti un mensahe enfoca riba e balor historico, comunitario y simbolico di e edificio.
Den su intervencion, Pastoor Ashby a expresa su aprecio na lidernan, invitadonan y colaboradornan presente, incluyendo representantenan di Union Adventista Hulandes Caribense y partnernan internacional. Pastoor Ashby a indica cu e proceso di restauracion ta bay mas leu di un proyecto fisico, y cu e ta contribui na preservacion di identidad y herencia di e comunidad.
Segun Pastoor Ashby, e iniciativa a cuminsa algun aña pasa como un discusion tocante mehoracion di e edificio. Sin embargo, despues di evaluacion y guia di Monumentenbureau, a determina cu e structura tin un balor excepcional, clasificando esaki como un monumento di Clase A. E resultado aki a orienta e proyecto den direccion di restauracion y conservacion, enbes di renobacion convencional.
Pastoor Ashby a splica cu tin un diferencia importante entre renobacion y restauracion: mientras renobacion ta implica adaptacion of modificacion, restauracion ta enfoca riba proteccion y conservacion di caracter original di un edificio.
Den su mensahe, Pastoor Ashby a pone enfasis riba e rol historico di e iglesia den comunidad, mencionando e contribucion di pioneronan y e desaroyo di comunidad cu a forma a lo largo di tempo. Segun Pastoor Ashby, e edificio ta representa un punto di referencia importante den e historia local.
Pastoor Ashby a enfatisa adicionalmente cu e edificio tin un balor historico particular, siendo e prome Iglesia Adventista estableci na Aruba. Segun Pastoor Ashby, e luga no solamente ta representa un herencia cultural, pero tambe un espacio cu a forma parti di bida di generacionnan di miembro di iglesia, kende a contribui activamente na su desaroyo y mision den comunidad.
El a destaca cu e proceso di restauracion a requeri coordinacion entre diferente actor, incluyendo apoyo di Prome Minister Mike Eman y instancia gubernamental, cu a brinda respaldo positivo for di un iniciativa. Pastoor Ashby a reconoce cu e proceso no ta sin reto, considerando e complehidad tecnico y costo involvi, pero cu conscientemente a wordo escogi pa sigui e caminda di restauracion enbes di renovacion.
Ademas, e a expresa su aprecio pa director Raul Gei di Monumentenbureau, kende for di principio a brinda guia y recomendacionnan cu a contribui na direccion di e proyecto.
Tambe a destaca cu e proyecto di restauracion ta refleha cooperacion na nivel regional entre comunidadnan Adventista den Aruba, Boneiro y Corsou, como expresion di responsabilidad comparti pa preserva patrimonio.
Pastoor Ashby a invita comunidad pa sigui sostene e iniciativa, subrayando cu preservacion di e edificio ta contribui na mantene historia, identidad y balornan comparti.
E mensahe a conclui cu un reflexion di speransa y continuidad, indicando cu e restauracion ta crea espacio pa actividadnan comunitario, reflexion y encuentro, respetando su significado pa e comunidad cu e edificio ta sirbi.
