Pa motibo di murmuracion Dios a caba cu henter un pueblo den desierto (Numbernan Capitulo 14) y pa motibo di rebeldia, murmuracion y no kere den Dios e pueblo di Israel a cana 40 anja den desierto y mayoria di esnan cu tabata murmura a muri den desierto.
Kico ta murmuracion? Murmuracion ta un forma di ta malagradecido y menosprecia e bondad cu Dios ta haci cu hende, y un forma di chercha y reta demostrando cu locual Dios a haci no ta suficiente of bo no ta kere locual cu Dios ta haci y ta pesey bo ta rebeldia di curazon contra Dios.
Hende mester biba agradecido na Dios, hopi hende ta biba den murmuracion sin nan sa. Y hopi ta completamente bon na altura di locual nan ta haci.
Pasobra tur hende cu ta pidi un prueba di Dios su existencia ta den murmuracion y rebeldia, pasobra Dios no tin nada di prueba na nos ,tur cos a wordo proba caba ( Juan 3 :16) awor ta nos deber di prueba nos obedencia y fieldad na Dios.
Y nos mester ta conforme cu Dios ta duna nos rosea, bida y salud pasobra ta esey nos mester pa nos por bay dilanti.
Ora hende ta murmura , Dios ta aparta, y Dios su rabia ta aumenta, y locual nos ta spera, lo no wordo realisa si nos no stop di murmura.
Nos no por keda keto bay den cosnan bieuw y nos kier Dios haci cos nobo, nos no por discuti tur dia riba mesun cos den nos cas, pasobra sin nos sa discuccion ta bira murmuracion, y murmuracion ta pica dilanti di Dios.( Philipensenan Capitulo 2 vers 14)
Si bo duna bo yiu un auto y door di un accident e a kibra e auto completamente, esey no ta dunabo e rason pa lanta y zundra tur dia y bisa’’ Ta Mihor mi a keda cu e auto’’ e ora ey bo zundramento ta bira murmuracion.
Den e tempo dificil aki bo esposo a perde trabao awor e entrada a baha hopi , y no ta tur cos cu bo kier bo tin na abundancia, awel e esposa no por lanta bisa e esposo ‘’Ta mihor bo a lagami na cas di mi mayornan’’ esey ta murmuracion.
Un yiu cu tin custumber di hanja tur cos serca su mayornan, no por lanta bisa ‘’ Mi ta cansa di e cas aki , no tin nada den e cas aki’’ esaki ta tambe ta murmuracion y rebeldia.
E pueblo di Israel despues di pasa 400 aña den esclavitud na Egypto y Dios a saca nan milagrosamente via Laman Cora tabatin e curashi di bisa Moises . ‘’ Mihor nos a muri den Egypto”.E murmuracion ey a costa nan bida den desierto. ( Numbernan Capitulo 14 vers 2+3)
Murmuracion ta hopi na moda, hende cu conocemento ta murmura, y no kier laga pasado bay , pero esey ta un falta di respet y rebeldia contra Dios, caminda nan no kier reconoce Dios su bondad y su misericordia.
Philipensenan Capitulo 6 vers 4 ta siña nos con nos mester ta agradecido na Dios.
Sinceramente
Pastor Marcel Balootje.
