Dia 16 di november 2021, Post Aruba N.V. a emiti un serie di stampia nobo. E serie aki yama “Agricultura” y ta diseña pa Sr. Elvis Tromp.

Tocante e diseñador:
Elvis Tromp ta un pintor y diseñador grafico Arubiano kende a siña e artenan aki riba su mes.
Trahando principalmente cu verf di azeta, Elvis a pinta e bunita paisahenan Arubiano cu ta fascina hopi amante di arte pa mas cu 5 decada. Elvis a cuminsa pinta paisahe for di ora cu e tabata un mucha y ta gusta haci di cada escena su interpretacion personal. Tambe e ta haya tempo pa pinta potret di amigo y famianan.

Door cu Elvis ta un artista cu a siña riba su mes, el a haya oportunidad pa descubri su espacio, su estilo y su tecnica na su manera.
Aunke cu esaki tabata hopi dificil y a tuma hopi tempo na cuminsamento, e tabata algo hopi positivo cu a yud’e habri su caminda den bida pa bira un artista respeta y conoci.

Durante e ultimo decada, Elvis ta experimentando cu pinturanan abstracto y figurativo.

Elvis a yega di ilustra varios buki y tambe a yega di diseña stampia.

Descripcion di e serie di stampia Agricultura:
Agricultura ta e arte, sciencia y tecnica con pa trata e tera, crecemento di cultivo y criamento di bestia. E ta inclui e preparacion di productonan vegetal y animal pa personanan uza y su distribucion den mercado.
E metodonan uza por varia den henter mundo.

Durante siglonan, e crecemento di agricultura a contribui na e surgimento di civilizacion.

Adaptacion di matanan silvestre uza pa hende, yama domesticacion.
Aruba ta hopi seco y chikito (20 miya largo) cu un averahe di caida di awa di menos cu 20 inch pa aña.
Pa e motibo aki nos ta haya nos forsa pa concentra den cultiva diferente cultivo den cantidadnan chikito den un mesun area chikito.
E tipo di hardineria aki a trata pa cultiva mata mas cerca di otro pa maximalisa e espacio y tambe pa minimalisa e necesidad pa elimina e yerbanan indesea.
Agricultura vertical tambe ta un opcion. Nos por pensa riba uza materialnan economico manera palet pa traha nos mesun cahanan, uzando un espacio minimo, pero cu capacidad pa cultiva nos berdura y frutanan.
Tur persona por duna nan mes e luho di tin un area chikito den nan cura, y cu un inversion chikito, cultiva nan mesun berdura- y frutanan.

Santa Rosa (Departmento di Agricultura, Cria y Pesca di Aruba) ta duna sosten na e agricultornan local.
Na Aruba nos ta cultiva un variedad amplio di mata manera tomati, promenton, maishi rabo, bonchi, patia, papaya, milon, pinda y concomber. E cultivo ta principalmente pa consumo personal.
Durante e pandemia di Covid 19 nos a realisa con importante e ta pa cultiva nos mesun productonan. Fuera di yuda Aruba na diversifica su economia, esaki lo trece cu den futuro e importacion di berdura cu fruta lo no ta necesario mas y nos lo por depende di nos mes y nos agricultornan local pa haya berdura y fruta fresco.
E diseñonan riba e stampianan ta mustra e proceso for di e plantamento y muhamento, e crecemento y cosecha di e fruta, haciendo uzo di cahanan di palo traha cu palet (tambe hardin vertical), tur concentra riba un espacio limita.
E serie aki ta consisti di cuater stampia di e siguiente balornan: 90c, 220c, 320c, 420c cu ta bira un total di Awg.10.50 pa e serie. E ta compaña tambe pa su envelop di prome dia di emision na e balor di Awg.13,50.

E serie aki ta obtenibel na tur oficina di Post Aruba, respectivamente na Oranjestad y San Nicolas.

E bunita serie aki no por falta den bo coleccion. Busca esun di bo awe mes, ya cu e cantidad ta limita.
Pa mas informacion tocante e serie di stampia ”Agricultura” por bishita e pagina di Facebook Aruba Stamps of website: postaruba.com/philatelic/

LEAVE A REPLY

Please enter your comment!
Please enter your name here