Den colaboracion cu Fundacion Parke Nacional di Aruba

Dia 8 di juni 2021, Dia Mundial di Oceanonan, Post Aruba N.V. ta emiti su serie di stampia, den forma di un ‘souvenir vel’ titula ‘Bida Marino’.

E emision a wordo realisa den colaboracion cu e Fundacion Parke Nacional di Aruba pa medio di un concurso di fotografia di naturalesa cu a tuma lugar na december 2021.

E emision di stampia aki ta acompaña pa un envelop Prome Dia di Emision cu a keda diseña pa Sr. Armando Goedgedrag.

Descripcion di e stampianan:

Titulo: Tortuga berde di lama; un faborito local

Ubicacion: Arashi , Aruba

Fotografo: Kanter Constandse 

Leyenda (nota aclaratorio) di e fotografo: 

Na nivel local, e tortuganan probablemente ta e encuentro mas popular pa e buceadonan. E tortuga aki tabata descansa riba un cama di coral cual ta un lugar di alimenta conoci pa tortuga: rif di Arashi. E yabi pa bo por acerca un tortuga sin molestie  ta un acercamento lento, mientras bo ta hala rosea lentamente pa no haci zonido y pa minimisa e movimiento. 

E tortuga ta marca su proteccion natural rond di dje y na e parti ariba e coral como corona simbolico di su bunitesa. 

Descripcion di e criatura: tortuga berde di lama.

E tortuga berde di lama ta biba  den lama tropical y subtropical na henter mundo, cu dos poblacion distinto den oceano Atlantico y Pacifico, pero tambe bo ta hay’e na oceano Indico. Na henter mundo, bo ta haya e poblacionnan mas grandi di tortuga di lama na e Great Barrier Reef na Australia y den lama Caribe.

E cuminda di tortuga berde ta cambia segun su edad. E yiunan ta carnivoro, pero segun cu nan ta crece, nan ta bira omnivoro. Tortuganan di lama cu ta jong ainda, ta come webonan di pisca, molusco, kimakima, animalnan chikito sin weso, bichi, spons, alga y animalito cu casca (schaaldier). Tortuganan berde di lama ta crece relativamente lento debi na e balor abou nutricional di su dieta. E vet corporal ta haya color berde debi na e vegetacion cu e ta consumi. Cu nan cachete manera un zaag, nan por kauw alga y yerba di lama. Mayoria tortuga adulto di lama ta estrictamente herbivoro. 

Manera otro tortuganan di lama, e tortuga berde aki ta migra distancianan largo entre areanan di alimentacion y beachnan di reproduccion. E muhenan ta lastra riba beach, ta coba neishi pa pone webo anochi. Mas despues e yiunan ta aparece y nan ta drenta awa. Esunnan cu ta bira adulto, lo por yega te hasta 90 aña den naturalesa. 

E tortuga aki ta cataloga door di IUCN y CITES como un especie menasa y p’esey e ta keda proteha na mayoria pais pa no wordu explota. Ta ilegal pa  bo hunta (colecciona) nan, haci nan daño of mata nan. Ademas, tin hopi pais cu ley y reglanan pa proteha e  areanan di reproduccion. Sinembargo, keto bay e tortuganan ta core riesgo door di actividadnan humano.

Pa sirbi como alimento na algun pais, ainda nan ta jaag riba tortuga y su webonan .

Contaminacion ta haci daño indirectamente na e tortuganan tanto riba escala di poblacion como individual. 

Hopi tortuga ta muri despues cu nan keda pega den e redanan di pisca.  

Ademas, e desaroyo di real estate hopi biaha ta causa perdida di habitat ora cu e neishinan na beach keda elimina.  

Titulo: “Cara” di un lenga di flamingo 

Ubicacion: Rif di Arashi, Aruba 

Fotografo: Vasco v. Baselli

Leyenda (nota aclaratorio) di e fotografo: 

Keto bay mi ta keda sorprendi cuanto beyesa bo por descubri ora bo acerca e detayenan mas chikito di e mundo submarino. Den e imagen super macro aki, e detayenan di e “cara” di e cocolishi Lenga di Flamingo (Cyphoma gibbosum) ta haya bida y casi ta parce cu e tin un sonrisa. Aruba, isla feliz, na unda te hasta e cocolishi ta hari! 

Descripcion di e criatura: Cocolishi lenga di flamingo.

Cocolishi lenga di flamingo ta un especie di cocolishi di lama di tamaño chikito, pero cu colornan briyante, cu ta biba den e awa tropical di Oceano Atlantico occidental, den lama Caribe, Golfo di Mexico y e islanan di Antiyas Hulandes. 

E calco lenga di flamingo ta alimenta su mes di e tehido bibo di e coralnan moli na unda e ta biba.  Hembranan adulto ta pone webo den e coralnan caminda nan a alimenta recientemente. Despues di mas o menos 10 dia e larvanan ta sali.  

Na bida, e cocolishi tin un color geel oranje briyante cu algun marca preto. Sinembargo, e colornan aki no ta aparece den e casca, pero nan t’ey debi na e tehido bibo di e mantel cu generalmente ta cubri e casca. E cocolishi por trek  e “halanan” di e mantel aden, pa asina e casca ta bira visibel, pero esaki generalmente ta sosode solamente ora bo ta ataca e animal.  

E especie aki tabata masha comun, pero el a bira bastante poco comun den areanan cu trafico halto debi na e coleccion excesivo di parti di buceadornan, kendenan ta comete eror di pensa cu e colornan  briyante  ta situa den e casca di e animal.

Titulo: Flotando (drif) den coriente

Ubicacion: Entre Buraco den Muraya (Hole in the Wall) y Isla di Oro, Aruba

Fotografo: Tobia de Scisciolo

Leyenda (nota aclaratorio) di e fotografo: 

E Bichi Plumemero Magnifico ta un bestia bunita y mi ta aprecia di saca su potret. 

Mi ta gusta uza nan specialmente como e pieza central di mi potretnan pero casi nunca riba nan so. Manera por mira riba e imagen, bo ta haya nan isola riba un coral, di moda cu si bo uza e angulo corecto, bo por logra haya e fondo blauw scur aki, cu ta casi preto. E fondo blanco y scur ta laga mi disfruta con e topico principal ta destaca su mes contra e fuerte contraste di e fondo oceanico cu ta blauw scur.

Descripcion di e criatura: Bichi cu pluma.

Bichi cu pluma ta famia di bichinan den tubo marino y cu ta biba sin cu nan ta move. Nan ta conoci pa nan tentaculo fuerte cu ta sali for di nan tubo y cu ta parce un stoffer. 

Bo ta haya un bichi cu pluma hopi biaha den e zonanan di e rifnan na henter mundo y nan ta posiciona nan mes den coriente suave na unda tur dia nan por haya cuminda di plancton cu ta suficientemente suave pa asina no daña nan corona cu tin pluma. E corona cu pluma , for di cua el a haya su nomber, ta un parti special di su curpa cu e ta uza pa por gara plancton y hinca den boca. 

E bichinan cu pluma no tin ni cara ni wowo, pero nan por detecta cambio di luz y asina nan por uza e sensibilidad di luz aki pa proteha nan mes contra depredadornan. Si un bichi cu pluma detecta un sombra of si e ta siniti su mes menasa, e ta retira su mes den su tubo pa asina haya proteccion. Tambe e tin e capacidad pa reproduci su mes asexualmente a traves di fragmentacion.

Titulo: E cangreu fantasma 

Ubicacion: Pink Beach/Pyramid Rock Patras di Arashi , Aruba

Fotografo: Nohemy Habibe 

Leyenda (nota aclaratorio) di e fotografo: 

Riba mi ultimo dia di saca potret na e ‘Pink Beach’/’Baranca Piramid’ tras di e duinen di Arashi, mi a nota un movemento na e skina di mi bista. Mi a yega di mira hopi cangreu fantasma, pero nunca un asina grandi. Nos tabatin un momento di comprension mutuo ora el a laga mi saca varios potret for di diferente angulo y distancia. 

Descripcion di e criatura: Cangreu fantasma 

E cangreunan fantasma ta cangreunan di costa comun den regionnan tropical y subtropical na henter mundo, cu ta biba den holnan profundo den e region intermareal. Nan ta comedo di aas  y depredador di animalnan chikito. 

E nomber “cangreu fantasma” ta deriva di su bida nocturno y su color generalmente bleek cu ta mezcla bon cu e santo, aunke e por cambia gradualmente e color di curpa pa adapta su mes na su medio ambiente y na ora di dia. 

E caracteristicanan di e subfamia ta inclui entre otro; un pata mas grandi cu e otro, wowonan den forma poco diki y largo y un curpa den forma di caha.

Nan ta semi-terestre y ta respira oxigeno di aire a traves di klina (kieuw) humedo. Regularmente nan mester muha nan klina cu awa di lama, generalmente door di saca awa for di e santo humedo of door di core contra e olanan pa asina nan haya caricia di e olanan. Sinembargo, nan por keda solamente pa un tempo limita bou di awa, sino nan ta hoga. Nan ta keda den nan hol durante e parti mas caluroso di dia y durante e parti mas friu di invierno. 

E cangreunan fantasma ta ser afecta negativamente door di actividadnan humano riba e beachnan, manera ora hende ta pasa trapa nan, construccion di dijk of e presencia di materia inorganico contamina. Debi na su distribucion global y e facilidad con por inspecciona nan holnan, e cangreunan fantasma ta ser considera indicadornan ecologico valioso pa evalua rapidamente e impacto di hende cu ta stroba den e habitat di beach. 

E souvenir vel aki y Envelop di Prome dia di Emision ta obtenibel na Post Aruba na Oranjestad y San Nicolas.

Pa mas informacion tocante e serie di stampia “Bida Marina”, bo por consulta e pagina di Facebook: Aruba Stamps of pagina web: postaruba.com/philatelic/

LEAVE A REPLY

Please enter your comment!
Please enter your name here