Ultimo tempo courantnan y tambe otro medianan ta yena cu un diferencia di placa entre HOH y AZV, cu HOH ta reclama. Na Aruba AZV ta paga e factura di e cuido medico duna dor di trahadornan di HOH y mantención na HOH.
Den prensa nos a lesa mashar hopi comunicado mes, hopi cualnan no ta realístico y a bruha hende mas. Na cuminsamento nos a tende for di HOH mes, cu e suma cu HOH no ta ricibi pa e cuido duna na Patientnan na Aruba ta alrededor di 4 miyon florin pa luna. Un suma haltisimo cual ta suma na casi 50 miyon pa anja, spantoso. Tambe cu si no bini solución, entrante november 2026, lo bay baha e cuido medico na HOH.
Esaki ta nifica cu consecuentemente, Trahadornan lo bay cobra menos ya cu nan ta traha menos. Pero awor hopi información ta resulta di no ta correcto.
Awor nos ta tende for di Director di HOH mes, cu e suma total ta alrededor di 29 miyon y siguiendo e ideología di Trump y Lidernan político di Union Europeo kendenan ta culpa imigrantenan di tur cos. Según Vroegop, ta e cuido na Migrantenan cu no ta registra como miembro di AZV, ta e fayo cu HOH no a ricibi placa pa e cuido aki, cual ta suma F 29 miyon.
Pues AZV no ta carga ningún culpa!!
Por bisa cu e declaracionnan di Vroegop/HOH, anteriormente duna, tabata, “te vroeg”.
Parlamentarionan a bruha e situacion mas ainda.
Tambe varios Parlamentario a trece comunicadonan cu tabata bruha hende mas.
Parlamentario Hart ta bisa/scirbi, cu e suma a acumula, for di 2017 cu 1,7M te loke e ta awe. Cu su rason, demasiado simplistico, e ta purba di hinca e partido awe, den oposición como causante di e problema, pasobra e tabata goberna na 2017 y e problema no ta asunto di awe.
Si nos pone linjanan na cada argumento cu e a trece ariba e problema y conectanan via otro linja cu e otro argumentonan, nos ta construi un mapa bruha, y cual nos por yama e mapa di linjanan loco.
E parlamentaronan Bermudez y Tromp-Lee tambe a saca comunicadonan largo, yenando un pagina completo di un Courant, mencionando varios scenarionan, reunionnan cu varios instancianan, analisisnan, posicionnan aki y aya, di ministro y hopi mas.
Aki tambe si traha linjanan pa cada argumento y conecta nan cu otro argumentonan di nan mes, nos ta construi cu e linjanan aki, un bunita neishi di haranja, unda ta dificil o mihor bisa imposible pa yega na conclusionnan correcto.
E solución di hende sensato, hende positivo ta, sinta na mesa y dialoga.
Pakico no ta sinta na mesa y dialogando cu tur envolví y busca un solución?
HOH/Vroegop un biaha mas cu un posición “tevroeg”,ta menasando awor pa hiba Aruba Corte, mi ta asumi cu HOH kier meen Gobierno di Aruba. AZV no ta carga culpa den esaki. Pero pakico bay corte, e proceso ta tarda hopi y por bini apelación, etcc.. Hendenan sensato envolví semper ta BUSCA mesa di dialogo y si mester ta invita algún observador tambe, pero hendenan cu conoce e materia pero sin bos, ni voto, pa assisti y conseha.
Sintando na mesa y dialogando ta yega na e mihor solucionnan.
E filosofía di AZV ta uno social y tabata corresponde cu e pensamentonan=ideologianan social cu tabata biba cerca lidernan Politico, lidernan Sindical, lidernan Empresarial y mas cu a popone y defende AZV, e tempo aya. En corto esakinan ta poni den e pagamento di e prima:
• Esnan cu bon salud ta yuda esnan cu un salud menos;
• Hobennan ta paga pa esnan cu edad mas halto y avanza, un tempo bo tambe ta cu edad avansa.
• Esnan cu mas entrada ta contribui mas compara cu esnan cu menos entrada;.
• Tin mas ideanan considera como algo social.
E filosofía aki ta dicta cu pa e problema actual mester bay mesa pa dialoga y busca solución.
Tremendo filosofía di AZV cu mayoría di politiconan a lubida, dor di cu nan no ta ponele mas den practica. Awe ta e ideología di ESTABLSIHMENT ta dicta e pensamento cerca mayoría di Politiconan den tur partido político. Igualmente esaki ta conta pa hopi lidernan sindical.
Un poco di e historia di AZV
Como líder Sindical den SEPPA, mi persona tabata hopi envolví den e nacimento di AZV durante e anjanan 1990 pa 1994 y después ora a pone AZV den funcionamento na final di siglo pasa y inicio di e siglo aki. Den mi comunicadonan y programa Radial di SEPPA semper mi persona tabata defensor di AZV.
Mi tabata miembro di e Uitvoeringsorgaan di AZV y di Financiele Commissie di AZV na inicio ora AZV a cuminsa funciona, tempo cu AZV a ricibi hopi ayudo di expertonan Hulandes.
Mi amigo, e político Charo Kelly, den feliz memoria, tabata e homber grandi di AZV.
Como Ministro di Salubridad Publico a pusha AZV. Hunto cu su man drechi Willem Vrolijk, dokter van Veen, den feliz memoria y mas hendenan den e partidonan político ADN, MEP y PPA. Tambe na directie Wetgeving tin personanan cu a traha hopi ariba e Raamwet= landsverordening AZV cu a pasa den Parlamento na 1994. Lamentablemente e partido AVP a vota contra na 1994, pero na inicio di e siglo aki, nan tabata e partido cu a pone AZV den funciónamento, di acuerdo cu instellingsbesluitnan poni den e Raamwet= landsverordening AZV di 1994, cu nan mes a vota contra.
Mi mester bisa cu e único Sindicatonan e tempo ey cu a apoya AZV tabat SEPPA y SADA. Tur otro sindicatonan di Aruba, esta den SdU (Sindicatonan den Union) tabata contra.
Historia di AZV tambe tin su ironianan.
Gobierno cu un landsbijdrage.
Mi a reuni cu extrahadornan di LAGO, ya cu e suma cu EXXON a pone pa cubri gastonan medico di e extrahadornan di LAGO tabata cabando y tabata motibu pa e penshoenadonan aki drenta AZV mas lihe posible , ora AZV cuminsa funciona. Tambe como líder di SEPPA mi tabata na altura di e situación financiero di e fondo pa cubri gastonan medico di Penshoenadonan cu a traha den sector publico na Aruba y na Antiyas Hulandes, FZOG, registra na Corsow, pero cu un debe di banda di 20 miyon florin, por bisa bancarota.
Aki ta toca penshoenadonan cu hopi tabata miembro di SEPPA. Tambe tabatin e penshoenadonan cu ta ricibi un PPK-Kaart di Gobierno, amanan di cas y desempleadonan sin seguro y otronan cu un seguro priva, kendenan mester a drenta AZV.
E prima cu e penshoenadonan na Aruba, cu mi a menciona anteriormente ta bay paga na AZV no ta cubri ni mínimo, e gastonan di AZV.
Pesey, na inicio di AZV, na cuminsamento di e siglo aki, pa un fase transitorio, gobierno tabata duna un landsbijdrage na AZV pa cubri gastonan extra, eo pa cubri gasto di penshoenadonan y otronan. Na inicio e tabata banda di 35 pa 40% di e totalidad cu AZV tabata cubri.
E landsbijdragenan na AZV a termina, na mi opinión hopi lihe. Den comunicadonan y programanan Radial di SEPPA mi a menciona esaki.
Mester menciona aki tambe cu e gastonan medico na penshoenadonan ta hopi mas halto compara cu e gasto medico di un promedio trahador.
Mas bo edad subi, mas problema cu salud.
Sigur e motibu di gobiernonan e temponan ey pa stop cu e Landsbijdragenan , tabata cu nan tabata scars den placa.
E problema actual di HOH mester ser busca den e dirección aki, esta un sorto di landsbijdrage.
Un biaha mas ‘BAY MESA DI DIALOGO”.
Huiswerk pa parlamentarionan busca solucion pa otro problemanan.
1. Diploma EPI.
Hopi comentario nos ta tende tocante e Stagierenan Hulandes. Mi tabata hopi na HOH relaciona cu enfermedad di conocirnan ultimo tempo. Mi opinión ta cu nan ta profesional y ta dunando bon cuido medico. Como stagiere esta un trahador na otro país, nan tin tur derecho ariba tiket Hulanda> Aruba y retour, hospedage y cuminda. Na Aruba no tin un transporte publico adecua, pesey nan mester ricibi un bon compensacion pa transporte na Aruba y nan trabao di warda.
Tin stagiere ta drenta den servicio permanente na HOH, cual ta bon pa nos tur na Aruba. Tin información cu nos hobennan cu ta cabando EPI=MBO no tin mesun preparación cu e stagierenan Hulandes y cual ta motibu cu e Arubiano cu EPI no ta drenta HOH. Ta bon pa investiga esaki, si enberdad esaki ta e caso. Si e opleiding na EPI falta algo. Onderwijszaken, leiding di EPI y HOH mester sinta pa drecha esaki, si enberdad tin diferencia entre stagierenan y alumnonan cu a caba EPI . Si ta un HBO-Opleiding o otro cursonan ta e diferencia, nos politiconan/Gobierno, HOH y AZV mester percura pa esaki
2. Discriminacion bao trahadornan
Trahadornan na Fundacionnan p.e na Wit-Gele-Kruis den sector publico cu Diploma di EPI y otro trahadornan cu a drenta den servicio después di 2014, no ta ricibi e mesun condicionnan di trabao cu e trahadornan cu si tabata den servicio di e fundación na 2014. Pues un discriminación grandisimo na un fundación. Dos clase di trahador, uno cu ta ricibi e gelijkbedrag, Bashi Premie y Dianan di ATV, igual na e Ambtenaary e otro ta ricibi F 150,= fin di anja, nada di Gelijkbedrag, nada di Bashi premie, nada di dianan di ATV, pues nan ta traha 40 ora pa siman y e trahadornan mas bieuw ta traha 38 ora pa siman. Un discriminación grandi cual ta causa frustacion, pleitonan y mas cos malo na pia di trabao pa motibu di e discriminacion cu Gobierno a crea, pa no ta subsidia e areglonan aki pa trahadornan cu a drenta servicio despues di 2014.
3. Gelijkbedrag pa Penshoenadonan cu a bandona gobierno después di 2015.
E asunto menciona bao punto 2 tin di haber cu e punto aki, nr 3.
Nos tur sa kico a pasa for 2011 pa 2014. E gobierno di Turno di signatura berde tabatin anjanan cu deficit di algun cien miyon florin. Pa pone e presupuesto keda na orden ta fia placa igual na e deficit. Na 2014 e deficit a surpasa 400 miyon floro y gobernador Refunjol no kier a firma e landsverordening pa presupuesto 2014. Hulanda a para tras di Gobernador. Nos por corda cu e consecuencia a bira un welga di hamber di prome-ministro Eman, bisando cu e no ta bay entrega ni un milimetro di nos Status Aparte. Awe cu HOFA esaki a bira miles di kilometro.
Gobierno a haye ta tuma medidanan y un di nan ta pa crea mas descriminacion y stop Gelijkbedrag y Bashi Premie pa esnan den sector publico cu ta bay cu penshoen entrante 2015.
Pues Parlamentarionan cu ta sostene gobierno, cu a trece e discriminacionnan aki for di 2015, sigur e ex-director di W.G.K., awe Parlamentario di Futuro, kende a laga e discrminacionnan bao punto 2, cualnan ta encera su personal, “drumi” ariba su lessenaar tur tempo.
Tambe pa esnan den oposicion cu durante 7 anja di 2017 pa 2024, no a elimina e discrimminacionnan aki, menciona den puntonan 2 y 3, awor nan tin un bon oportunidad pa cumpli cu nan huiswerk=tarea eliminando e discriminacionnan aki.
Man na obra, pronto parlamentaronan ta bay aproba e PRESUPUESTO SUPLETORIO pa 2026.
Gregorio Wolff
