Dia 11, 12 y 13 di augustus 2026, San Nicolas lo bira centro di un proceso di desaroyo nacional sin precedente. Durante e promé “Forum on the Future of San Nicolas”, Suzette Dumfries lo presentá e resultadonan di cinco aña di investigacion profundo den y riba San Nicolas cu a culmina den un vision, direccion y plan di desaroyo concreto pa San Nicolas.
E Forum ta un iniciativa di Suzette Dumfries, cu sosten di CEDE Aruba y PKF Dutch Caribbean & Suriname in Aruba. Pa promé biaha, un proceso ta wordo organisá cu ta trece Gobierno, Parlamento, institucionnan público, sector financiero, companianan di seguro, inversionistanan, empresarionan, doñonan di propiedad, organisacionnan civil, profesionalnan, hobennan y residentenan di San Nicolas hunto pa comprondé e realidad completo di San Nicolas y e direccion necesario pa su futuro.
Suzette Dumfries ta un Nation Builder y economista di desaroyo y cultura. Durante e último cinco añanan, e a investigá e realidad económico, social, cultural, histórico, espacial y institucional di San Nicolas. Awor e ta trece investigacion, e voz di comunidad y tur actor relevante hunto cu e meta di presentá un plan y un estructura integral di desaroyo pa San Nicolas.
E “Forum on the Future of San Nicolas” no ta un otro reunion pa papia solamente tocante revitalisacion. E ta inicio di un proceso di desaroyo nacional cu ta cuminsá cu evidencia, ta presentá e realidad y voz di San Nicolas, y despues ta traducí esaki den un plan concreto, un estructura pa implementacion y un ruta pa ejecucion.
“San Nicolas no mester un otro promesa, un otro proyecto separá ni un otro conversacion sin continuacion. San Nicolas mester un direccion claro, un plan integral y un estructura cu por convertí e plan den accion,” Suzette Dumfries a bisa.
E “Forum on the Future of San Nicolas” ta consistí di cinco fase. E promé dos fasenan lo wordo completá den augustus 2026. Durante Fase 1, dia 11, 12 y 13 di augustus 2026, Dumfries lo presentá e resultadonan di cinco aña di investigacion independiente. Durante tres anochi, público lo haya un bista profundo di con San Nicolas a yega na su situacion actual, cua sistemanan económico formal y informal ta operá den e ciudad, cua barreranan structural ta tene desaroyo atras, y cua activo, talento, propiedad, cultura y oportunidadnan ainda no ta wordo aprovechá.
E investigacion ta mustra e conexion entre historia, economia, empleo, emprendemento, comercio, propiedad, vivienda, seguridad, migracion, explotacion, cultura, identidad, espacio público, inversion y acceso na capital. Tambe lo presentá loke residentenan, empresarionan y otro stakeholdernan a expresá consistentemente tocante e futuro cu nan kier pa San Nicolas: e Voice of San Nicolas.
“Pa cinco aña mi a studia San Nicolas for di aden pa pafor. Mi a mira su historia, su economia, su comunidadnan, su vulnerabilidadnan y su potencial. E momento a yega pa pone e evidencia completo dilanti di San Nicolas y Aruba, sin romantis’é, sin simplific’é y sin tapa loke ta incomodo,” Dumfries a declara.
Durante Fase 2, e Civic Forum di 20, 21 y 22 di augustus 2026, Dumfries lo presentá e propuesta pa un vision, un direccion di desaroyo y un Plan Regional Integral pa San Nicolas. E plan lo traducí cinco aña di investigacion den un direccion coherente cu ta conectá economia, planificacion espacial, desaroyo social, cultura, patrimonio, seguridad, vivienda, institucionnan, inversion, financiamento y implementacion.
Ademas di e plan, lo presentá un estructura integral di desaroyo cu ta mustra con e proceso por wordo organisá, coordiná, financiá y ejecutá. Tambe lo discutí e areanan prioritario di desaroyo, e responsabilidadnan institucional y e ruta necesario pa pasa di planificacion pa realisacion.
“Investigacion sin plan ta keda descripcion. Un plan sin investigacion ta bira suposicion. Pero un plan sin estructura tampoco por wordo ejecutá. E proceso aki ta uni evidencia, plan y estructura,” Dumfries a bisa.
Futuro di San Nicolas no por wordo separá di futuro di Aruba. Loke pasa na San Nicolas ta afecta empleo, comercio, inversion, propiedad, vivienda, seguridad, cultura, cohesion social y desaroyo económico di henter pais.
P’esey, Suzette Dumfries ta trece tur stakeholders y residentenan di San Nicolas hunto den un solo proceso.
“E meta no ta pa tur participante ta di acuerdo cu tur elemento di e plan. E meta ta pa cada actor ta informá, comprondé e evidencia y mira claramente cua rol e por tin den futuro di San Nicolas.” , Dumfries ta amplia.
“San Nicolas no por wordo desaroyá sin San Nicolas. Pero San Nicolas tampoco por wordo desaroyá pa su so. Gobierno, sector priva, institucionnan financiero, inversionistanan, organisacionnan civil y comunidad mester drenta e proceso y comprondé nan responsabilidad,” Dumfries a enfatisa.
Presencia di residentenan di San Nicolas ta especialmente importante. “Si San Nicolas no ta presente, otro hende lo sigui papia pa San Nicolas. Esey no por sigui. San Nicolas mester aparece, scucha, papia y participa.”
E “Forum on the Future of San Nicolas” ta completamente gratis, pero registracion ta obligatorio. Registro pa e presentacion di resultadonan di investigacion dia 11, 12 y 13 di augustus 2026 ta disponibel via: https://www.suzettedumfries.com/sannicolas
Un link separá pa e Civic Forum di 20, 21 y 22 di augustus 2026 lo wordo anunciá pronto.
Tocante Suzette Dumfries
Suzette Dumfries ta Nation Builder, economista di desaroyo y cultura, y antropólogo psicológico, cu experiencia internacional den desaroyo económico, transformacion institucional, liderazgo y construccion di nacion. Su trabou ta enfocá riba e manera cu economia, cultura, conducta humano, institucionnan, sistema financiero y structuranan di poder ta influenciá desaroyo di comunidadnan y paisnan. E ta especialisá den traducí investigacion profundo den vision, plan, structura institucional y ruta concreto pa implementacion.
Tocante CEDE Aruba
CEDE Aruba ta sostené iniciativa y programa cu ta contribuyí na fortalecemento di comunidad, participacion social y desaroyo sostenibel na Aruba. Pa medio di su sosten na e “Forum on the Future of San Nicolas”, CEDE Aruba ta contribuyí pa haci e investigacion y e proceso participativo accesibel pa comunidad y pa tur actor cu tin un interes den futuro di San Nicolas.
Tocante PKF Dutch Caribbean & Suriname in Aruba
PKF Dutch Caribbean & Suriname na Aruba ta un firma boutique di servicio financiero cu ta ofrece audit, tax, contabilidad y asesoria empresarial. E oficina na Aruba a wordo lansá na juli 2023 y ta ubicá na L.G. Smith Boulevard 64 na Oranjestad. E ta liderá pa managing partners Edsel Lopez y Herbert van Elferen. Como sostenedor di e Forum, PKF Dutch Caribbean & Suriname in Aruba ta contribuyí na un proceso cu ta conectá investigacion, desaroyo económico, institucionnan, inversion, financiamento y implementacion.
