Dia internacional di conservacion di naturalesa ta wordo observa rond mundo riba e fecha 28 di july. Riba e dia aki, ta pone atencion na conscientisacion riba proteccion y conservacion di nos recursonan natural. Tin varios aspecto cu ta expone nos naturalesa na peliger, pero na mes momento mas y mas pais ta reconoce esaki y implementa cambionan.
Pa salvaguardia futuro generacionnan, un medio ambiente saludabel ta esencial y cada pais tin e responsabilidad pa contribui na esaki. Nos planeta ta percura pa provee e necesidadnan basico pa por garantisa sobrevivencia esta: awa, aire, cuminda, mata y bestia, pues ta suficiente motibo pa mantene nos naturalesa limpi y saludabel.
Un dia e motibonan pa cual hopi biaha ta destrui natralesa ta pa construccion di casnan, edificionan y caretera pa facilita bida di e ser humano. A pesar cu ta reconoce e necesidad pa vivienda pa cumpli cu demanda y necesidad di e poblacion, un balans ta mucho mas importante. Ora no ta existi un balans entre conservacion di naturalesa y desaroyo di un pais, esaki por contribui na entre otro mas desaster natural y malesanan cu ta surgi.
Aruba tambe ta haci di su parti pa percura pa desaroyo sostenibel a traves di implementacion y ehecucion di leynan pa entre otro: proteha areanan di naturalesa, prohibi materialnan dañino pa naturalesa y door di continuamente sondea opcion y alternativa pa mehora procesonan anticua cu no ta na beneficio di naturalesa manera e proceso di maneho di desperdicio.
Cada persona por duna di nan parti door di simplemente comparti informacion di e balor di naturalesa, evita di uza productonan cu ta causa daño na naturalesa y aprecia nos beyesanan natural sin causa daño na esaki.
Prome Minister Evelyn Wever-Croes: “Un desaroyo balansa y sostenibel lo ta na beneficio di nos tur. Nos lo sigui duna contenido na e Metanan Mundial di Desaroyo Sostenibel y lo pone enfasis riba proteccion di nos medio ambiente y crea oportunidadnan riba tereno di agricultura. Naturalesa y medio ambiente saludabel ta indespensabel pa un sociedad saludabel.
Mi ta haci un suplica na cada ciudadano di nos pais, pa como bon ciudadano, nos tur tambe semper keda aporta y cuida nos naturalesa pa un miho desaroyo pa nos pais”.
