Cu hopi dolor na curason a bin constata e deterioro den bario di De Vuyst. Diahuebs mainta, tuma luga un otro edicion di Accion di Bario. Na yegada di Prome Minister mr. Mike Eman, e mandatario a keda babuca y no por kere cu un biaha mas e bario ta den e situacion aki. Durante prome gobernacion a bin encontra e bario aki totalmente neglisha y cu hopi esfuerso y determinacion a logra revitalisa e bario, cu mata, klinkers, speeltuin, gazebo y duna e bario e atencion cu e tabatin mester.
Esaki ta un refleho di e realidad amargo den cual pa casi ocho aña, e gobierno anterior no a haci ni un inversion den e barionan aki. Esaki ta na borde di abuso, mirando cu e ta pasa e limite di negligencia.
“Bo no por ta gobernante di un pais y laga un bario deteriora di e forma aki”, Prome Minister Eman a menciona. “Unda gevoel y sentido di responsabilidad a keda? Un bario renoba, awo laga atras den e estado aki”.
Bario di De Vuyst ta un bario cu a haya su debido atencion, tanto na infrastructura como embeyecemento. E tempo ey, henter e bario tabata contento, pa awe despues di ocho aña di negligencia, tin cu mira con a bay atras.
Accion di Bario tin e meta pa incentiva e habitantenan pa reconoce cierto problema y brinda nan e hermentnan pa por yuda soluciona esakinan den forma colectivo como habitante di e barionan. Habitante di e bario aki tin nan reto financiero caba pa cuminsa y cu e atencion di un gobierno den bario, ta stimula cada un pa lucha pa miho.
Prome Minister Eman ta haya cu e ta un tristesa di mira con un gobierno ta neglisha barionan di e forma aki, e ta haci dolor y mescos cu esaki tin mas bario cu ta den decadencia similar.
Durante e ultimo 7 pa 8 aña, gobierno anterior a neglisha y bandona mayoria bario den cual habitantenan tabata sclama pa atencion social, pa e hobennan, pa parkenan di recreo y pa mehoracion di e calidad di bida den e barionan cu a keda deteriora.
E compromiso di Gabinete AVP-Futuro, ta pa revitalisa nos barionan di manera structura y duradero pa tur hende por biba un bida digno. Lo sigui informa e comunidad di cada bario y kico tur ta tumando luga pa un biaha mas duna atencion necesario na cada bario, duna nan un bida husto atrobe y perspectiva pa futuro. Trabou ta grandi, pueblo a pidi pa bolter cos y ta bario pa bario lo pasa pa asina en berdad bolter cos pa e cuidadanonan di nos pais.
