Reunion no ta bay si bo ta pro of contra corupcion, pero si tin confiansa den e minister si of no.
Ta netamente Fraccion di MEP a entrega varios denuncia di corupcion na Ministerio Publico
Diahuebs merdia, Parlamentario di MEP y lider di fraccion den parlamento Sr. Rocco Tjon a trece su punto di bista relaciona cu e problema den Partido POR regardando e retiro di Minister Marisol Lopez Tromp. Tjon tabata na Radio Top 95, den Noticero 95 cerca Sr. Juancho Werleman.
Pakico Sr. Rocco Tjon a firma e carta pa yama reunion:
Sr. Tjon a bisa cu e ta kere cu ta hopi importante na prome luga pa splica cu un reunion publico no por wordo yama cu dos firma so y esey ta e motibo tambe dicon den e caso aki como parti di coalicion y ami como lider di fraccion den e caso aki a sostene e peticion di partido POR. Pa loke ta trata e reunion di mañan no ta mi persona so, pero e lider di fraccion partido RED tambe a sostene e peticion pa asina por tin un reunion. Pasobra sin esey no lo por tin un reunion mes. Mi ta kere ta hopi importante tambe pa splica cu fraccion di MEP tambe ta haña importante pa minister Marisol Lopez Tromp ta presente na e reunion y pesey tambe presidente di parlamento den e caso aki no a opta pa yama e reunion dialuna mes of diamars sinembargo pa yam’e diabierna, pasobra interes general mester bay prome cu interes personal. Pesey tambe a duna den e caso aki tres dia pa hasi’e posibel tambe pa minister por ta presente.
Sr. Tjon a sigui splica cu tur peticion pa reunion publico, e minister ta wordo invita y ta confirma si e ta bin of e ta splica e motibo dicon e no por ta presente na parlamento. Den e caso aki mi tin comprondi cu te cu aworaki no tabata tin ningun carta of noticia cu a yega parlamento, cu ta bisa cu e minister no lo por tey presente diabierna, pesey mi ta spera tambe cu e minister ta presente pasobra mi ta kere ta hopi importante pa por tin claridad di transparencia riba e topico aki.
Un punto hopi importante ta e parti unda mi a ripara cu den comunidad e debate ta wordo hiba cu e reunion di diabierna tin haber cu corupcion. Mi kier enfatisa e parti aki, diabierna no ta si bo ta “pro corupcion” of “contra corupcion”. Esey mester ta hopi duidelijk pasobra ta trata netamente algo straatsrechterlijk cu e pregunta: si tin confiansa di e minister si of no.
Anto pakico mi kier toca e parti aki di corupcion? Pasobra mi kier recorda tur hende cu un investigacion cu ta wordo haci no ta un minister ta hasi un invistigacion. Un minister por para un investigacion. Un investigacion ta wordo hasi door di institutonan manera un ministerio publico sosteni door di un landrecherche, door di un cuerpo policial, pues e no ta un minister of e beraeu di un minister ta inicia un onderzoek of ta ehecuta un onderzoek of por para un onderzoek. Mi ta kere esaki mester ta hopi duidelijk pa pueblo mes, whatever happens den futuro ta pa e retiro, si e retiro di e minister, di e peticion di e partido POR den e caso aki haya sosten den parlamento. Si e haya sosten of e no a haya sosten, e investigacionnan cu a wordo inicia caba y cu ta encaminando lo sigui. E ta hopi importante pa splica e parti aki, y mi kier stress riba esaki pa pueblo no lubida tampoco cu net e fraccion di MEP na 2018 a entrega un onderzoeksrapport cu tin haber cu fraude cu a tuma lugar entre otro cu otorgamento di tereno.
Kiermen mi no kier ni pa e pensamento por biba eyfo, cu den e caso aki fraccion di MEP ta sostene corrupcion of algo por estilo pasobra ta net nos fraccion ta esun cu a entrega un onderzoeksrapport ya caba for di 2018, Sr. Rocco Tjon a bisa den Noticiero 95 na Top FM
