Informacionnan cu a yega diabierna mainta na SOLO DI PUEBLO ta bisa cu Sr. Richard Eman, kende ta presidente di raad van bestuur di RDA, a entrega su retiro. Motibonan no ta conoci dicon a tuma e decision aki.
Richard Eman desde 2017, comienso di 2018 a bira presidente di raad van bestuur, poni dor di e coalicion actual. Pa casi 3 aña a fungi den e posicion aki y tabata tin bao su encargo pa termina e contract cu Citgo, cual el’a logra haci tambe na un manera, cu no a costa pais Aruba placa ni tempo.
Bao di su dirigencia como presidente a cuminsa un tanda di destaho publico pa asina por busca un operador nobo pa e refineria of un otro industria.
E destaho publico aki ta den pleno proceso. Ademas tambe bao su dirigencia a tuma over e tank farm, unda a cuminsa na oferta esaki na companianan international pa almacena crudo, pagando un huur. E ultimo aki no a cristalisa, ora cu un compania cu a duna mihor oferta, no por a presenta placa riba mesa, cual a haci cu e negoshi di huurmento di tankfarm por el momento mester sigui wordo atendi.
Sr. Richard Eman tambe ta presidente di bestuur di Utilities NV y te asina leu cu Solo di Pueblo a compronde, e retiro aki ta concerni solamente RDA, pues por lo pronto lo sigui fungi como presidente di Utilities Nv.
Solo di Pueblo a purba na haci contacto pa confirma e informacion aki, pero te awor cu nos a publico, no a haya reaccion oficial.
