Fundacion SIKI (Stichting Instituut voor Kennis en Innovatie) ta lanza su prome seminario pa publico en general cu e tema “AruBIG y Calidad di Cuido”. E seminario aki lo tuma lugar riba diaranson, 1 di september 2021 di manera online
Fundacion SIKI ta un fundacion non-profit cu a wordo funda na november 2016 y tin como meta pa empodera individuonan y trece cambio social positivo pa mehora calidad di bida. Esaki Fundacion SIKI ta logra haci door di primordialmente duna curso di nivel halto, manera cursonan postgrado. Esaki a tuma lugar tambe riba 1 di juli 2021 cu un Masterclass calidad y financiamento di cuido duna na sector di Salud na Alhambra Ballroom. Fundacion SIKI ta trata di duna cursonan y seminarionan tambe pa otro profesionalnan y interesadonan cu lo por haci uzo di e conocemento aki den e.o. nan trabow. Cu e seminario aki Fundacion SIKI ta trata di comparti cu tur profesional di salud, sirbidornan publico, recurso humano, trahador di seguro medico (social/publico) y naturalmente tur pashent e conocemento di nos leynan di calidad, e retonan cu nan ta trece y e oportunidadnan pa futuro.
E Seminario “AruBIG y Calidad di Cuido” ta sumamente interesante pa tur persona cu kier sa mas di e ley nobo di AruBIG y tambe tur e leynan di Calidad di Cuido. E orador pa e seminario aki lo ta meester doctor Jayburtt J. Dijkhoff, kende a wordo promovi recientemente na Universiteit Utrecht riba e tema aki, esta: “Regulacion di calidad: e derecho riba calidad di cuido di salud na Aruba.” Meester doctor Jayburtt J. Dijkhoff lo comparti cu e participantenan informacion valioso.
Tur participante lo haya un bista completo con Calidad di Cuido ta hinca den otro. Esaki ta encera:
– AruBIG
– Medisch Tuchtrecht
– Standard profesional y bon cuido
– Ley di AZV
– Derecho di pashent E seminario ta bai profundo den e materia y ta duna cada participante e bista completo tocante nos leynan. E seminario lo wordo duna na Papiamento. Pa mas informacion por bishita e pagina di Facebook SIKI Aruba. Pa tuma contacto cu Fundacion SIKI por haci esaki via email sikaruba@gmail.com
